Ásgerður Jóna Flosadóttir, formaður Fjölskylduhjálpar Íslands, er á flótta undar fjölmiðlum og gefur engan kost á því að ræða gagnrýni sem fram hefur komið undanfarið á mismunun í úthlutun samtakanna til fátækra.
„Ég þakka þér kærlega fyrir að hringja en ég ætla ekki að tala við blaðamann,“ var hið eina sem Ásgerður Jóna fékkst til að segja áður en hún lagði á blaðamann Mannlífs.
Á síðustu vikum hafa komið fram reynslusögur bæði fyrrverandi og núverandi sjálfboðaliða og skjólstæðinga hjálparsamtakanna sem lýsa dapurlegri reynslu sinni. Ásgerður og félagar eru sagðir meðal annars mismuna skjólstæðingum vegna kynþáttar þar sem Íslendingar fái jafnvel meira í pokana. Samtök kvenna af erlendum uppruna hafa harðlega gagnrýnt Fjölskylduhjálpina og kallað eftir því að Reykjavíkurborg dragi styrki sína til baka reynist sögurnar réttar. Fjölmenningarráð borgarinnar hefur nú þegar kallað eftir skýringum frá Fjölskylduhjálpinni.
Eins og áður sagði reyndi Mannlíf að leita svara hjá Ásgerði Jónu vegna ásakananna en án árangurs. Það er ekki í fyrsta sinn sem hún neitar að ræða þær við fjölmiðla.
Athugasemdir