Í Morgunblaðinu í dag birtist vægast sagt undarlegur pistill eftir Ólaf F. Magnússon, fyrrverandi borgarstjóra. Þar segir Ólafur að Dagur B. Eggertsson, núverandi borgarstjóri, hafi eyðilagt líf sitt ásamt allri þáverandi borgarstjórn, RÚV og menntaskólabörnum. Hann sakar Dag um að hafa stýrt nemendunum og sjáfu Áramótaskaupinu.
Ólafur byrjar pistilinn á því að vitna í orð bloggarans Jens Guð var gestur á Útvarpi Sögu á dögunum. Jens sagði Ólaf hafa orðið fyrir miklu einelti sem borgarstjóri. Jens sagði það hafa verið ógeðslegt hvernig hamast var á Ólafi. „Það var virkilega sótt að Ólafi og fólk var orðljótt og það var skelfilegt að fylgjast með þessu. Ég var stuðningsmaður hans þannig að ég fylgdist með því hvað þetta var og gekk svo nærri Ólafi að hann hefur sagt frá því opinberlega að hann íhugaði að taka líf sitt,“ sagði Jens meðal annars.
Ólafur segist vilja bæta það: „Við þessi orð Jens Gud má bæta eftirfarandi. Ég hóf læknisstörf á ný 1. október 2007 eftir tæplega 9 mánaða veikindi. Ég hugðist einnig hefja störf í borgarstjórn með haustinu. Þegar nýr meirihluti myndaðist undir forystu Dags Eggertssonar 14. október 2007 vildi ég eðlilega koma fljótt aftur og nefndi 1. nóvember 2007 í símtali við Dag og hlustaði núverandi eiginkona mín á símtalið og getur staðfest viðbrögð Dags við áætlaðri endurkomu minni í borgarstjórn. Hann sagði: „Þú getur það ekki. Margrét Sverrisdóttir er búin að gera ráð fyrir launum sem forseti borgarstjórnar næsta hálfa árið“ ! Eftir þennan undanfara í meirihluta„samstarfi“ við vinstrimenn leið mér ekki vel í návist þeirra enda óvelkominn í hópinn og samstarfið frá fyrstu tíð,“ lýsir Ólafur.
Hann heldur svo áfram: „Ég hélt út frá 1. desember 2007 til 21. janúar 2008 í vinstra samstarfinu en sleit því hinn 21. janúar 2008 þegar tilkynnt var um meirihlutamyndun mína með Sjálfstæðisflokknum. Allur borgarstjórnarflokkur F-listans stóð að baki mér við þá stjórnarmyndun, nema þær Margrét Sverrisdóttir og Guðrún Ásmundsdóttir, sem fylgdi Margréti í einu og öllu og saman komu þær stöllur fram sem sannir vinstrimenn. Engu skipti þó að ég næði fram 14 stefnumálum F-listans í málefnasamningi við sjálfstæðismenn í 17 liðum, þar sem flugvallar-, skipulags- og Laugavegsmálin voru í öndvegi. Og Orkuveitan skyldi vera um alla framtíð í almannaeigu. Strax eftir fundinn á Kjarvalsstöðum hóf Björk Vilhelmsdóttir rætna lygaherferð á hendur mér grundvallaða á svikalæknisvottorði Dags Eggertssonar, þar sem farið var með svívirðileg orð um mig sem persónu.
Ólafur lýsir svo samsæri gegn sér þar sem nemendur áttu að hafa verið notaðir gegn honum. „Sama dag stofnuðu þau til undirskriftasöfnunar gegn mér, Lísa Kristjánsdóttir, núverandi aðstoðarmaður Katrínar Jakobsdóttur, systir hennar og leikkonan Ilmur Kristjánsdóttir, „söngvaskáldið“ Hörður Torfason, Ellen Kristjánsdóttir söngkona og Anna Pála Sverrisdóttir, formaður Ungra jafnaðarmanna í samstarfi við þau og að undirlagi Dags Eggertssonar var breytt um fundartíma í borgarstjórn frá kl. 14 til kl. 12 til að hægt væri að safna nemendum vinstrisinnaðra kennara í framhaldsskólum á pallana (þar á meðal kennara sonar míns í MH!) til að öskra á mig fúkyrði. Þetta var ólögmæt aðgerð og án samráðs við mig sem forseta borgarstjórnar. Auk skipuleggjenda í skrílslátunum í Ráðhúsinu var þingmaðurinn og síðar heilbrigðisráðherrann Álfheiður Ingadóttir virk í öskrum og ólátum á ráðhúspöllum þennan dag. Meðal kjörorða skrílsins á pöllunum var „Þú ert enginn „fokking“ borgarstjóri,“ og „Farðu aftur á geðveikrahælið helvítis auminginn þinn.“ Óhugnanlegt var að sjá forystumenn Samfylkingar og Vinstri grænna í borgarstjórn, þau Dag Eggertsson og Svandísi Svavarsdóttur, veifa neðan úr borgarstjórnarsalnum til skrílsins sem var með steytta hnefa á pöllunum. Þau Dagur og Svandís gáfu skrílnum merki um þögn þegar þau sjálf vildu tala. Dagur borgarstjóri fór í engu eftir fundarstjórn minni sem forseta borgarstjórnar og tók stjórn fundarins í sínar hendur,“ lýsir Ólafur.
Svo segir hann Spaugstofuna og Áramótaskaupið hafa verið síst skárri. „Það skal þó tekið fram að þessi skrílslæti voru síst illgjarnari en þátturinn Spaugstofan á Rúv 26. janúar 2008. Óhætt er að fyllyrða að meirihluti fréttamanna og þáttastjórnenda á Rúv hafi verið meðal illvígustu andstæðinga minna í borgarstjóratíð og miklu lengur. Andúð Rúv í minn garð entist allt árið 2008, eins og sýndi sig með grimmilegu einleti gegn mér í áramótaskaupi í umsjón tveggja verðandi borgarfulltrúa, þeirra Ilmar Kristjánsdóttur og Jóns Gnarrs. Banvæn lokaatlaga undan rifjum Dags B. Eggertssonar árið 2012,“ skrifar Ólafur.
Hann segist hafa misst geðheilsuna þá. „Það sveiflaðist milli hæða og lægða í aðförunum gegn mér og sömuleiðis í geðheilsu minni. Ég var mikilvirkur þegar ég fékk frið til þess, en fór niður á við þegar ofbeldis- og ofsóknarhryðjurnar gengu yfir. En mjög syrti í álinn 12. janúar 2012, þegar Dagur B. Eggertsson, formaður borgarráðs, fékk með sér alla meðlimi borgarráðs til að hefja lögsókn gegn mér og saka mig um fjárdrátt vegna borgarmálastyrks F-listans árið 2008 að upphæð kr. 3,4 milljónir. Þetta kom mjög á óvart, því að í síðustu ræðu minni í borgarstjórn, 1. júní 2010, lagði ég fram tillögu um lögreglurannsókn á nýtingu styrkja til borgarstjórnarflokkanna á kjörtímabilinu 2006-2010 að upphæð kr. 130.000.000. Sú tillaga var felld með atkvæðum allra annarra borgarfulltrúa,“ lýsir Ólafur.
Hann gengur svo langt að fullyrða að Dagur hafi gert atlögu að lífi hans. „Þessi endurtekna, óvægna og tilefnislausa aðför gegn mér sem stóð yfir frá 12. janúar 2012 til 31. ágúst 2013 var lokahnykkurinn í atlögu Dags B. Eggertssonar að lífi mínu, heilsu og hamingju. Í liði með honum í borgarráði voru þau Samfylkingarkonan Björk Vilhelmsdóttir, „sjálfstæðismennirnir“ Hanna Birna Kristjánsdóttir (þekkt fyrir lygar) og Júlíus Vífill Ingvarsson (þekktur fyrir fjárdrátt), Sóley Tómasdóttir frá Vinstri grænum og þau Óttarr Proppé og Elsa Yeoman úr Besta flokknum,“ skrifar Ólafur.
Athugasemdir