Ekkert verður af bóluefnarannsókn Pfizer hér á landi – Ástæðan: Við höfum staðið okkur of vel

Lyfj­aris­inn Pfizer hefur hafnað þeirri hug­mynd að fram­kvæma bólu­efna­rann­sókn hér á landi með því að bólu­setja alla íslensku þjóð­ina á einu bretti. Ástæðan er sú að við höfum hrein­lega staðið okkur of vel í sótt­vörnum fram til þessa og smitin eru of fá í sam­fé­lag­inu.

Þetta kom í ljós á nýaf­stöðnum fundi íslenskra sótt­varn­ar­yf­ir­valda og Kára Stef­áns­sonar, for­stjóra Íslenskrar erfða­grein­ingar, með for­svars­mönnum lyfj­aris­ans. „Það eru hverf­andi líkur á því að þetta verði. Ástæðan er sú að hér eru svo fá smit og lítur út fyrir að það sé erfitt að meta hvort þetta myndi skila þeim árangri sem rétt­læti að gera þetta. Það er erfitt fyrir okkur að mæta þeim rökum,“ segir Kári í sam­tali við Mannlíf.

Bólu­efna­rann­sókn Íslands og Pfizer á í grófum dráttum að snú­ast um hversu vel bólu­efni fyr­ir­tæk­is­ins verndar heila þjóð fyrir kór­ónu­veirunni. Þrálátur orðrómur hefur verið uppi í sam­fé­lag­inu að Pfizer myndi sam­þykkja að taka þátt í rann­sókn­inni. Nú er ljóst að svo verður ekki. Að minnsta kosti ekki í bráð.

Viðræður um að gera Ísland að hjarð­ó­næm­istil­raun hafa staðið yfir um nokk­urt skeið. Ef þetta hefði orðið að veru­leika hefði Ísland orðið laust við COVID á met­tíma og eðli­legt líf gæti byrjað á ný.