Birgitta Haukdal, rithöfundur og söngkona, hugsar daglega til bróður hennar sem tók eigið líf á unga aldri. Hann var aðeins 18 ára gamall og Birgitta þá fjórum árum yngri. Bróðurmissirinn var það mikið áfall að söngkonan vinsæla var næstu fjögur ár í djúpri sorg.
Líf Birgittu hefur ekki alltaf verið auðvelt því hún missti eldri bróður sinn en hún ræddi sáran bróðurmissinn í þættinum Tónlistarmennirnir okkar á Stöð 2 í gærkvöldi. Þar ræddi hún meðal annars um lagið Eldur í mér með Írafár og hvernig textinn fjallar um andlát bróður hennar.
„Við vorum mjög náin og elskuðumst og hötuðumst eins og systkini gera. Það var rosalega erfitt að vera unglingur á þessum viðkvæma aldri og lenda í svona stóru áfalli. Unglingsárin mín mótuðust svolítið af þessu stóra áfall,“ sagði Birgitta sem var í raun í sorg þar til hún varð sjálf átján ára gömul.
„Það er eiginlega þegar ég fer suður í sönginn. Ég hugsa alltaf til hans þegar ég kem til Húsavíkur og ég held að ég hugsi nánast til hans daglega, hann var stór hluti af mínu lífi.“
Athugasemdir