Jón Viðar Jónsson gagnrýnandi hefur fengið sig fullsaddan af fólki sem kvartar undan því að þurfa að nota grímu. Hann segir sanna Íslendinga kunna að þreyja þorrann og bíða þess að aftur birti. Hinn valkosturinn sé líklega fjöldagrafir í Gufunesi.
„Þetta er nú meiri barlómurinn sem gellur við hér á FB um grímuskylduna. Það var kannski ekki heppilegt af Þórólfi sóttvarnalækni að missa það út úr sér að við kynnum beinlínis orðið vel við grímurnar, en fyrr má nú vera; maðurinn hefur staðið í víglínunni í ár, staðið sig á heildina litið frábærlega vel svo við megum öll vera þakklát fyrir. Þó honum verði einu sinni smá fótaskortur á tungunni!,“ segir Jón Viðar á Facebook.
Hann segir flesta sammála um að grímurnar séu ekki þægilegar. „Eflaust fara grímurnar misvel í menn, við sem göngum með gleraugu getum fundið fyrir svolítið óþægilegri móðumyndun, en þá er ekki annað að gera en ýta grímunni smástund niður fyrir nefið; það drepur varla nokkurn mann nema maður sé alveg upp í öðrum sem gerist nú orðið æ sjaldnar!!,“ segir Jón Viðar.
Hann segir að Íslendingar ættu að þekkja það að þurfa að bíða betri tíðar. „Reynum að skilja það að þetta fyrirkomulag er (ef einhver skyldi ekki vera búinn að fatta það) til að vernda okkur sem heild, ekki síst þá sem mega við litlu; að tala um þetta sem „frelsisskerðingu“ er út í bláinn og lyktar ekki af öðru en pólitískum öfgum. Ekki vildum við horfa upp á Landsspítalann og aðrar heilbrigðisstofnanir springa undan álagi, eins og víða hefur gerst, eða fjöldagrafir teknar uppi í Gufunesi!! Nei, nú er að sanna að við séum „Sannir Íslendingar“ sem kunnum að þreyja þorrann og góuna og bíða þess að aftur birti á ný – eins og þar stendur!“
Athugasemdir