Reiði er á Ísafirði vegna uppsagnar þriggja starfsmanna Áhaldahúss bæjarins.Upplýsingafulltrúi Ísafjarðarbæjar staðfesti við Bæjarins besta á Ísafirði að þremur starfsmönnum þjónustumiðstöðvar hefði verið sagt upp störfum.
„Ástæða þessara breytinga í mannahaldi er að snjómokstur í Skutulsfirði er ekki lengur á höndum starfsmanna þjónustumiðstöðvar eftir að gengið var til samninga við verktaka um snjómokstur í byrjun þessa árs.“ hefur bb.is eftir upplýsingafulltrúanum.
Eitthvað er það málum blandið að uppsagnir starfsamannanna snúist um snjómokstur. Guðni G. Borgarsson, starfsmaður þjónustumiðstöðvar, skrifar athugasemd við fréttina.
„Æ þessir snillingar í Marmarahöllinni. Þetta rugl i þeim er löngu hætt að vera fyndið,“ skrifar hann og vísar væntanlega til yfirstjórnar Ísafjarðarbæjar.
Baldur Smári Ólafsson spurði hvort þeim sem var sagt upp hafi allir verið snjómokstursmenn. Guðni svaraði því til að að einungis einn hefði verið í snjómokstri.
„Snjómoksturinn var 15% af vinnu þjónustumiðstöðvarinar, en þeir segja upp 3 af 5 verkamönnum. Við erum 2 eftir til að sinna þessum 75% verka sem eftir eru,“ skrifaði hann.Henry Júlíus Bæringsson er ómyrkur í máli í athugasemd sinni.„Það er ég viss um að þessir þrír menn, sem ég veit ekki hverjir eru, hafa örugglega staðið sína plikt og sinnt sínu. Ömurleg framkoma gagnvart starfsfólki. Og hvernig er það, þarf bæjarstjórn ekkert að fjalla um svona ákvarðanir? Eða getur framkvæmdastjóri sem fimm bæjarfulltrúar ákváðu að yrði ráðinn eftir að þeim gamla var sparkað, ákveðið svona? Mikið er meirihluti bæjarstjórnar ömurlegur“.
Athugasemdir