Öllum aðferðum virðist vera beitt til að reyna svíkja pening af fólki. Undanfarið hefur sama auglýsingin birst inn á hinum ýmsu íslensku Facebook hópum. Þar er einstaklingur sem kallar sig Montero Mbai að auglýsa tvo Siberian Husky hvolpa sem hann vill gefa. Viðkomandi segist þurfa losa sig við þá vegna nýs starfs. Eina sem þarf að greiða er flutningskostnaður fyrir hvolpana.
Tilboðið hljómar vissulega freistandi. En við lestur auglýsingarinnar sést glögglega á orðalagi og málfari að líklegast sé um svik að ræða: „Þessir hvolpar eru með öll bóluefnin sín og þau eru líka mjög heilbrigð. Þau eru bæði karlar og konur og eru góð með lítil börn og önnur gæludýr í húsinu og munu gera þig að hamingjusömri fjölskyldu.“
Til að reyna sannfæra fólk, sem sýnir hvolpunum áhuga, um að þetta sé allt saman heiðvirt og gott, eru send skilaboð í nafni flutningafyrirtækis: „Við viljum upplýsa þig um að við eigum Male Siberian Husky hvolpinn þinn hér á umboðsskrifstofunni okkar í Úkraínu til að senda og afhenda þér á Íslandi í dag þegar þú greiðir fyrir sendingarkostnað upp á 300 krónur.“
Upphæðin er vissulega ekki há, aðeins 300 krónur. En ef einstaklingur setur inn kortaupplýsingar sínar til að greiða fyrir sendingarkostnaðinn eru þær upplýsingar afritaðar og það gerir hinum óprúttnu kleift að nýta kort viðkomandi og þá geta stærri upphæðir farið að hverfa af reikningnum.
Þumalputtareglan er því, ef það hljómar of vel til að vera satt, þá er það mjög ólíklega satt!
Athugasemdir