„Við höfum enn ekki fengið afhenta fullbúna eign þótt við höfum keypt fyrir að verða tveimur árum,” segir Leifur Eysteinsson um íbúð sína í glæsihúsinu að Álalind 14.
Húsið fékk viðurkenningu Umhverfis- og samgöngunefndar Kópavogsbæjar fyrir hönnun og frágang, sem Leifi og öðrum íbúum hússins finnst ansi merkilegt í ljósi þess að frágangi er ekki lokið.
„Við hjónin keyptum í maí 2019 og gerðum kaupsamning um að bygging yrði tilbúin og afsal gefið út eigi síðar en 1. desember 2019. Sem betur fer höfum við haldið eftir greiðslum því húsið er ekki enn tilbúið. Það hafa því miður nokkrir kaupendur borgað sínar íbúðir upp í topp,” segir Leifur en 40 íbúðir eru í húsinu.
„Ég hefði talið eðlilegt að fólk fengi réttar upplýsingar um stöðu mála áður en það flytti inn, svo það hefði getað tekið upplýsta ákvörðun um hvort það vildi flytja inn yfirleitt,” bætir Leifur við.
Hið einkennilegasta mál
Allt í kringum þetta mál er hið einkennilegasta að mati Leifs. „Það var fasteignasalan Lind sem annaðist sölu íbúðanna fyrir Leigugarða, sem byggingarfyrirtækið ÁF-hús byggir fyrir og eru síðarnefndu fyrirtækin tengd. Það dettur síðan upp úr fasteignasalanum hjá Lind við gerð kauptilboðs að hans sé tengdasonur framkvæmdastjóra ÁF-húsa. Hann upplýsti þetta hins vegar ekki þegar hann sýndi íbúðina.“
Þrautaganga íbúa, hófst strax og flutt var inn. Margir keyptu og fluttu inn á árinu 2018. „Okkur hafði verið lofað fullbúinni íbúð og sameign en sumar íbúðir og sameign eru ekki tilbúin. Til dæmis er ástand parkets í nokkrum íbúðum, þar á meðal minni, ekki eins og á að vera í nýrri íbúð í glæsilegu húsi. Söluaðili parketsins hefur upplýst að byggingaraðili hafi ekki valið efni sem er gert til að vera á jafn stórum gólffleti og er í stærri íbúðunum í húsinu,“ segir Leifur.
Öryggisúttekt mikilvægust
Að mati íbúa brennur mest á að fá lokaúttekt sem hefur líklega ekki enn farið fram.
„Samkvæmt upplýsingum byggingarfulltrúa í Kópavogi fyrr í mánuðinum var hafin öryggisúttekt á húsinu í október 2018 en starfsmaður slökkviliðs höfuðborgarsvæðisins sem gerði úttektina yfirgaf húsið vegna ágalla þannig að úttektin féll niður. Þá var búið að leyfa íbúum að flytja inn án þess að öryggisúttekt lægi fyrir.“
Hann bætir við að hvorki fasteignasali né byggingarstjóri hafi upplýst íbúa um að öryggisúttekt hefði ekki farið fram og að samkvæmt byggingarreglugerð sé óheimilt að taka mannvirki í notkun eða flytja inn í það nema öryggisúttekt hafi farið fram.
„Öryggisúttekt fór loks fram um miðjan febrúar síðastliðinn. Byggingarfulltrúi segir að fasteignasali og byggingarstjóri hafi brugðist upplýsingaskyldu sinni.“
Að sögn Leifs er aðgengi fyrir hreyfihamlaða gert erfitt því það þarf að fara í gegnum þungar eldvarnarhurðar á handaflinu til að komast frá bílageymslu og í íbúð. Lóðin sé enn ófrágengin þótt byrjað hafi verið á lóðafrágangi á árinu 2019.
Íbúar sendir í hringi
Það er augljóst að Leifur veit varla hvar skal byrja eða enda hvað varðar samskipti hans við hina ýmsu embættismenn og byggingaraðila. „Við höfum margoft haft samband við byggingaraðila og byggingafulltrúann í Kópavogi til að afla upplýsinga og svara en svörin láta gjarnan á sér standa og byggingarfulltrúi vísar mörgu á byggingastjóra, framkvæmdastjóra ÁF-húsa.
Allir eru ósköp viðræðugóðir, en viðbrögðin eru bæði sein og dræm. Byggingarfulltrúi og byggingarstjóri virðast líta svo á að íbúðarkaupendur séu ekki aðilar að málinu, þótt kaupendur hafi nú þegar greitt nánast allt kaupverðið. Byggingaraðili virðist stjórna ferðinni og geta dregið úrbætur telji hann það þjóna hagsmunum sínum.“
Leifi segir það auðvitað alveg furðulegt ef opinberu byggingareftirliti sé ekki ætlað að gegna veigameira hlutverk í að gæta hagsmuna fólks sem kaupir í góðri trú íbúðir í húsi í byggingu. „Fyrirtæki og sterk hagsmunasamtök þeirra kvarta gjarnan yfir opinberum reglum sem er ætlað að tryggja gæði bygginga og hagsmuni íbúðakaupenda. Þegar til kastanna kemur þurfa kaupendur að gæta hagsmuna sinna sjálfir. Reglur þurfa að tryggja hagsmuni almennings gagnvart þeim sem hafa atvinnu af að byggja og selja eignir.“
Leifur hvetur fólk til að kynna sér málin og sýna aðgæslu áður en það leggur ævisparnaðinn í kaup á íbúð.
Athugasemdir