Fávitavarpið í Geldingahrauni er vafalaust umdeildasti Facebook-hópur Íslands um þessar mundir. Þar er barist gegn því að fólk sé með fíflagang við vefmyndavél RÚV við gosið. Í þágu þeirrar baráttu birtir fólk myndir af fólki og segir viðkomandi fávita, án þess að blikka. Hópurinn er því talinn af sumum „Þvílíkt samansafn af orðljótum og illa innrættum smásálum“, líkt og einn maður orðar það í einni fordæmingu af mörgum.
Árni nokkur úr Grindavík er þó líklega með áhugaverðustu rökin gegn tilvist hópsins. Hann segir þetta ekkert miðað við óþægindi þeirra sem búa á Suðurnesjum. „Fólk er að væla yfir fólki fyrir framan myndavél. Þetta fólk ætti að búa í Grindavík. Èg var a leiðinni heim eftir vinnu í bænum og Grindavíkurvegurinn var stíflaður upp á Reykjanesbraut! Voru margir vælu póstar yfir því her inni ? Örugglega ekki. Heimamenn og konur voru stop í þessari umferð ì 2-3 tíma til að komast heim til sín. Til að elda ofan í sig og sýna. Og þið vælið yfir einhverju vídeóstreami,“ skrifar Árni.
Hann segir fólki einfaldlega að hætta að væla. „Skiptið yfir a mbl.is ef þið hafið ekkert annað við ykkar tíma að gera! Ónæðið frá þeim sem eru keyra hingað inn í bæinn er mun meira en það að þið misstuð úr nokkrar sekúndur af skjánum. Við erum í vandræðum við að keyra út ì búð suma dagana ùtaf umferð sem er stop. HÆTTIÐ þessu helvítis væli ! Það er ekki eins og þið horfið á þetta LIVE STREAM 24/7.“
Ótal athugasemdir hafa verið skrifaðar og flestar eru þær grín á kostnað Árna. Einn reynir þó að stilla til friðar og segir: „Það hjálpar þér og íbúum Grindavíkur samt ekki neitt þó að þessi hópur væri ekki til. Ég skil pirringin mæta vel, en tilvera þessa hóps, og þeirra sem vilja óhindrað streymi frá gosinu, gerir hvorki umferðina til og frá svæðinu betri eða verri.“
Athugasemdir