„Þegar við komum inn gaf Ísabella sig á tal við starfsfólkið, eins og hún gerir alls staðar sem við komum. Ég heyri út undan mér eiganda verslunarinnar byrja að setja eitthvað út á hárið á henni við hana, eitthvað um hún þyrfti að laga á sér hárið, hún yrði að „gera eitthvað i þessu.”
Með þessum orðum hefst Facebookfærsla Eddu Óskar um ferð hennar með dóttur sína í ónefnda heildverslun í síðustu viku.
„Ég veit ekki hvað hann sagði nákvæmlega en ég veit að það kom Isabellu úr jafnvægi svo hun gekk bara i burtu og kom til min, augljóslega ekki kát.”
Edda segir að þegar hún hafi verið búin að borga vöruna og á leið út hafi sami maður komið á eftir sér og spurt hana hvort hún væri að selja dóttur sína. Edda spurði manninn hvað hann væri að meina.
„Geturðu ekki selt mér hana, ég get notað hana hérna”
Edda Ósk ákvað að tilkynna þetta til lögreglunnar. „Ekki sem glæp heldur óþægilegt atvik sem mér fannst rétt að tilkynna þar sem þessi sami maður er þekktur fyrir óviðeigandi framkomu gagnvart kvenfólki sem verslar hjá honum. Það hef ég upplifað sjálf og heyrt af ansi mörgum óþægilegum tilfellum.”
Hún fékk a endanum þau svör að þar sem um væri að ræða eiganda verslunarinnar væri ekkert hægt að gera. „Svo var mér sagt af lögreglumanni að þetta væri líka enginn hatursglæpur, heldur „klaufaleg framkoma”.
Viðbrögin partur af vandamálinu
Edda Óska segist í færslunni ekki vita hvort stingi meira, rígfullorðinn maður sem óski eftir að kaupa dóttur hennar eða lögreglumaður sem kalli þetta dæmi „klaufalega framkomu”. „Svona framkoma sé ekki klaufskapur og að kalla það slíkt sé partur af vandamálinu.“
„Honum var fúlasta alvara með þessu, fyrir utan það að ef þetta átti að vera „djók” þá skil ég ekki í hverju húmorinn liggur….. er fyndið að kaupa börn? Var það eitthvað fyndnara af því hún er brún? Eða er það almennur húmor að selja og kaupa börn til afnota? Nei.“
Hún segist vera þess fullvitandi að dónaskapur sé ekki lögreglumál en þetta viðmót frá lögreglumanni hafi stungið djúpt þar sem um sjö ára barn sé að ræða.
„En ég vil taka það fram líka að í fyrstu fékk ég allt önnur viðbrögð hjá lögreglunni þar sem sá tiltekni lögreglumaður vildi ganga i málið og ræða við þennan mann, en hljóðið breyttist snarlega þegar annar lögreglumaður tók við málinu og sneri þessu upp i „klaufalega framkomu” og benti mér á að hætta viðskiptum við þessa verslun eða ræða við hann sjálf.“
Edda segist ekki vilja nafngreina manninn á samskiptamiðlum en svari einkaskilaboðum vilji fólk beina viðskiptum sínum annað.
Athugasemdir