Sigurður og Heimir klifu hæsta fjall heims með Covid-19

Þann 26. maí síð­ast­lið­inn náðu þeir félag­arnir Heimir Fannar Hall­gríms­son og Sigurður Bjarni Sveins­son toppi Everest og það kór­ónu­veirusmit­aðir.

Segja þeir að að þeim hafi læðst sá grunur að þeir væru smit­aðir.
„Í efstu búðum Everest, það er í búðum þrjú og fjögur fórum við báðir að finna fyrir hósta ein­kennum sem okkur fannst skrítið í ljósi þess að við höfðum báðir aðlag­ast afar vel á und­ir­bún­ings­tím­anum og þar sem við vorum komnir með auka súr­efni í búðum þrjú.“

Sama dag og þeir fóru af stað á fjallið fóru þeir í Covid-19 sýna­töku sem reynd­ist nei­kvæð hjá þeim báðum og fóru þeir því af stað.

Heimir og Sigurður segja að veðrið á Everest hafi verið með versta móti þetta árið, þeir hafi til að mynda þurft að dvelja fjórar nætur í búðum tvö, þar sem menn reyna yfir­leitt að stoppa ekki lengur en eina til tvær nætur.
Þessi bið tók mikið á þá lík­am­lega og töldu þeir líkur á að þessi langi tími í svo mik­illi hæð væri að koma í bakið á þeim.

„Þegar við komum í búðir fjögur á South Cole (7900 metra hæð) tók við okkur mikið veðra­víti. 70-80% af tjöld­unum voru ónýt og þurfti að bregð­ast hratt við að tjalda upp á nýtt. Að koma upp nýjum tjald­búðum tók um þrjár klukku­stundir og var orðið ljóst að hvíldin yrði engin og veður var ekki að lægja líkt og spár gerðu ráð fyrir. Í stað þess að reyna við tind­inn 23. maí sl. ákváðum við að bíða til 24. maí sl. í ljósi þess að við áttum auka súr­efni sem dyggði í 24 klukku­stundir,“ segja þeir félagar.

Sigurður og Heimir

Þegar þeir lögðu af stað niður voru ein­kennin farin að áger­ast og voru þeir þá farnir að finna fyrir auk­inni þreytu, hósta og óþæg­indum.
Í búðum tvö voru þeir báðir orðnir afar slappir og vissu þeir að þeir þyrftu að kom­ast sem fyrst niður þar sem veður var auk heldur slæmt og því enga þyrlu­björgun hægt að fá.

Var Sigurður orð­inn mjög slæmur í lungum þegar þeir hófu göngu úr búðum tvö og þurfti hann að fá súr­efni.
„Þetta var erf­iður dagur í gegnum Khumbu Icefall en eins og fyrri dag­inn tók Siggi þennan dag á hnef­anum og komumst við allir heilir niður í grunn­búðir 26. maí sl.“

Þann dag fóru þeir í aðra Covid-19 sýna­töku og þá kom í ljós að báðir voru þeir smit­aðir.

Sigurður og Heimir eru nú fastir í grunn­búðum Everest í ein­angrun. Segja þeir þó líðan sína vera betri. „Höfum það ágætt hérna og erum enn að mót­taka það að hafa kom­ist á hæsta tind heims þrátt fyrir allt mót­lætið sem við höfum þurft að kljást við eins og veð­ur­far, meiðsl og veik­indi,“ segja þeir.

Á Everest klifu þeir í söfn­unar­átaki sem kall­ast Með Umhyggju á Everest og er til styrktar Umhyggju, félags lang­veikra barna.
Söfnun stendur yfir til 11. júní og hægt er að fara inn á Facebook síð­una „Með Umhyggju á Everest eða á Instagram síð­una „Umhyggja“ og styrkja mál­efnið.