Karlmaður var í gær dæmdur í Héraðsdómi Reykjavíkur fyrir að fara inn í grunnskóla í leyfisleysi þann 2. september 2019 og brjóta kynferðislega gegn þremur nemendum skólans.
Maðurinn lokkaði níu ára telpu upp á rishæð skólans þar sem hann kleip hana í rass og strauk læri hennar og kynfæri utanklæða.
Setti hendi á læri
Hann sló ennfremur fjórtán ára dreng á rassinn og settist bekk með þriðja barninu, fimmtán ára stúlku og færði sig nálægt henni. Þegar að stúlkan reyndi að komast undan honum setti hann hendi á læri hennar og elti hana þegar hún stóð upp. Hætti hann ekki eftirförinni fyrr en hún fór til hóps af drengjum.
Lögreglu barst tilkynning frá skólanum eftir að yngsta stúlkan hafði gefið sig á tal við starfsmann skólans og greint frá því að maðurinn hefði snert hana á klofsvæði. Telpan var í mikilli geðshræringu. Aðstoðarskólastjóri hóf leit að gerandanum og fann mann í skólanum sem passaði við lýsinguna, klæddur skítugum hvítum jogginggalla og talað hann ensku og enskuslettaða íslensku. Sagðist hann vera að bíða eftir frænda sínum.
Hann lét sig síðan hverfa þegar af honum var litið um stund.
Neitaði öllum sökum
Lögregla var kölluð á staðinn og hitti fyrir skólastjórnendur og ræddi við stúlkuna. Daginn eftir bárust upplýsingar frá skólastjóra að fjórtán ára drengurinn hefði gefið sig fram og nokkru síðar komu fram upplýsingar um þriðja brotið, gegn 15 ára stúlkunni. Ákærði neitaði öllum sökum en viðurkenndi að hafa verið staddur í skólanum en hefði engan kynferðislegan áhuga á börnum.
Manninum var gert að sæta níu mánaða fangelsi fyrir kynferðislega áreitni og brot gegn barnaverndarlögum og greiða yngri telpunni 500.000 krónur í miskabætur.
Athugasemdir