Guðmundur Karl Snæbjörnsson sérfræðingur í heimilislækningum hefur verið kærður af Lyfjastofnun vegna gruns um að hann hafi dreift lyfinu Ivermectin á Íslandi og að hann hafi uppi áform um að setja lyfið saman hér á landi og koma því á markað. Guðmundur Karl hefur í kjölfarið verið yfirheyrður af lögreglunni.
Guðmundur Karl hefur tjáð sig um notkun á lyfinu Ivermectin sem meðferð fyrir sjúklinga sem hafa smitast af Covid-19 veirunni og einnig sem forvörn gegn smitum og áhrifum veirunnar á fólk.
Lyfjastofnun hefur áður krafið Guðmund Karl um að taka niður færslur á Facebook, og hótað honum dagssektum og málssókn þar sem hann í færslunum talar fyrir notkun lyfsins; segist vitna þar í vísindalegar niðurstöðum. En Lyfjastofnun hafnar því með öllu að lyfið virki gegn Covid-19.
Þá hefur Guðmundur Karl varað við bólusetningum gegn Covid-19; haft uppi gagnrýni á stefnu sóttvarnayfirvalda í baráttunni gegn veirunni.
Guðmundur Karl telur að kæra Lyfjastofnunar sé tilkomin vegna þess að hann hafi sótt að stofnuninni; krafist vísindalegrar raka fyrir höfnun hennar á lyfinu Ivermectin.
Samkvæmt heimildum Mannlífs hefur Guðmundur Karl skrifað upp á lyfið fyrir sjálfan sig og nokkra aðra og að þeir lyfseðlar hafi verið samþykktir. Hann hafi þó ekki leyst lyfið sjálfur út, en ætlar ekki að láta Lyfjastofnun snúa sig niður og að í farvatninu sé möguleg fjöldamálsókn.
Á vefnum lyfja.is má finna þessar upplýsingar um lyfið Soolantra sem inniheldur virka efnið ivermectín:
Ivermectín hefur bólgueyðandi áhrif sem stafa af hömlun á framleiðslu á bólguhvetjandi cýtókína. Auk þess veldur lyfið dauða sníkjudýra en greint hefur verið frá því að svokallaðir Demodex maurar eiga þátt í húðbólgu. Lyfið er notað við meðferð við bólum og þrymlum í andliti sem fylgja rósroða (rósroði með nöbbum og bólum) hjá fullorðnum.
Athugasemdir