Jóhanna Sigurðardóttir, fyrrverandi forsætisráðherra, er öskuill út í Katrínu Jakobsdóttur forsætisráðherra og ríkisstjórn hennar. Og út í allan þingheim ef út í það er farið. Ástæðan eru endurtekin svik um nýja stjórnarskrá þrátt fyrir meirihluta vilja þjóðarinnar.
Jóhanna gerir þetta að umtalsefni í færslu á Facebook og skafar ekkert undan í skrifum sínum. Hún telur ljóst að áframhaldandi seta stjórnarinnar á næsta kjörtímabili þýði dauðadómur yfir nýrri stjórnarskrá:
„Þetta er nú meiri ræfildómurinn. hjá Alþingi Íslendinga. Níu ár og fjórar kosningar eru liðnar frá því þjóðin samþykkti með 2/3 hluta atkvæða vilja sinn til að lögfest yrði ný stjórnarskrá- sem í grundvallaratriðum var samin af þjóðinni sjálfri. Hvar í hinum vestræna heimi hefði það verið liðið að þjóðþing myndi hunsa slíkan þjóðarvilja þar sem þjóðin er stjórnaskrárgjafinn,“ segir Jóhanna ákveðin og heldur áfram.
„Ekki einu sinni var vilji hjá Katrínu forsætisráðherra og ríkisstjórn hennar til að samþykkja nú fyrir kosningar að hægt væri að breyta stjórnarskránni á næsta kjörtímabili, án þess að boða þyrfti til kosninga. Kjósendur geta því gengið útfrá því að óbreytt ríkisstjórn mun aldrei samnþykkja breytingar á stjórnarskránni á næsta kjörtímabili. í anda þjóðarviljans. Þennan Svarta Pétur taka íhaldsflokkarnir í núverandi ríkisstjórn með sér inní næstu kosningar.“
Björgvin G. Sigurðsson, fyrrum viðskiptaráðherra og flokksbróðir Jóhönnu, tekur í sama streng undir færslunni. „Skammarleg svik og snautleg hjá 3 flokka ihaldiinu,“ segir Björgvin.
Athugasemdir