Besti bassaleikarinn Jakob Smári um Covid 19: „Eigum við séns gegn þessari veiru?“

Einn allra besti bassa­leik­ari íslenskrar tón­listar, ef ekki sá besti, Jakob Smári Magn­ús­son veltir fyrir sér Covid 19 og mögu­leikum okkar gegn veirunni:

„Bólu­setn­ingar lof­uðu öllu fögru. Það var jú búið að sýna fram á það með vís­inda­legum rann­sóknum að það væri líf eftir bólu­setn­ingu. Gott og grímu­laust líf án tak­mark­ana. Allt yrði næstum því sem áður. Það hélt ég alla­vega,“ segir Jakob og bætir við:

„Jú, maður vill trúa og treysta yfir­völdum. Þeim sem taka ákvarð­anir byggðar á vís­inda­legum stað­reyndum. En mér líður eins og vís­indin hafi svikið mig. Eða yfir­völd, sem keyptu gall­aða vöru sem svo var dælt í þjóð­ina sem lét hendur standa fram úr ermum svo hægt væri að dæla í okkur betra lífi þar sem við gætum verið innan seil­ingar við næsta mann, jafn­vel faðm­ast og tekið á móti ferða­mönnum.

Og heldur áfram.

„Auðvitað var skrúfað frá landa­mær­unum og túristar fengu að flæða inn í landið til að skoða gosið, ganga á hraun­inu og eyða hér pen­ingum, svo ferða­manna­iðn­að­ur­inn færi ekki end­an­lega á haus­inn.

Ferða­brans­inn skiptir svo rosa­lega miklu máli. Hann skiptir meira máli en dag­legt líf og heilsa okkar sem hér búum. Svo var líka búið að bólu­setja okkur.

Við trúðum blint, eins og segir í lag­inu, og nú stöndum við uppi með fleiri smit en nokkurn tím­ann áður. Land­spít­al­inn hefur ekki undan. Veiran flæðir um,“ segir Jakob og veltir því fyrir sér „hvort við eigum séns gegn þess­ari veiru. Verðum við að lifa við tak­mark­anir eða eigum við bara að láta veiruna yfir okkur ganga þar til hún fær leið á okkur?“

Að lokum segir Jakob:

„Ég veit ekki hvað skal segja. Ég er ekki sér­fræð­ingur með vís­inda­lega þekk­ingu á bak­inu. Ég er ekki stjórn­mála­maður. Ég er bara mann­eskja sem líður eins og það hafi verið komið illa fram við mig eða ég hafi verið svik­inn á ein­hvern hátt.

Það eru að koma kosn­ingar en ég held að það breyti engu hverjir sigra þær. Senni­lega veiran.“