Trúbadorinn og bóndinn Hlynur Snær Theodórsson: „Svo syng ég iðulega í fjósinu“

Hlynur Snær og eig­in­kona hans, Guðlaug Björk Guð­laugs­dóttir, eru bændur á bænum Voð­múla­stöðum í Rang­ár­valla­sýslu. Þau eru með um 50 kýr og 25 kindur og það er mikið að gera í bústör­f­unum og útsýnið frá bænum er stór­kost­legt: Vest­manna­eyjar blasa við í suðri, Eyja­fjalla­jök­ull gnæfir í allri sinni dýrð í austri sem og Tind­fjöll og Fljóts­hlíð í norðri.

Hlynur Snær var í tón­list­ar­skóla á ung­lings­ár­unum og lærði á hljóm­borð og svo eign­að­ist hann gítar þegar hann var 17 ára. Hann fór á sínum tíma á söng­nám­skeið hjá Sig­ur­veigu Hjalte­sted til að læra radd­beit­ingu og er fyrsti tenór í Karlakór Rang­æ­inga og er í söng­hópnum Öðling­unum sem syngur mikið í jarð­ar­förum.

Hjónin eiga þrjú börn á aldr­inum 22 til 29 ára og barna­börnin eru þrjú. Þegar börnin voru orðin stálpuð fór Hlynur Snær að taka aðeins að sér að spila og syngja fyrir fólk. Það fór að vinda upp á sig fyrir um 16 árum og hefur verið auka­vinna hans síð­ustu fimm árin. Í fyrstu tengd­ist þetta karla­kór­a­skemmt­unum og kom þá Hlynur Snær gjarnan fram með hljóm­sveitum en svo fór hann að kalla í hina og þessa menn til að koma fram með sér til að koma meðal ann­ars fram á þorra­blótum og böllum. Síðustu ár hefur hann mikið komið fram með dóttur sinni, Sæbjörgu, auk þess sem önnur dóttir hans, Brynja Sif, kemur líka stundum fram með pabba sínum. Svo breytti Covid-heims­far­ald­ur­inn öllu. Sam­komu­tak­mark­anir voru settar á og í fyrra­haust fóru feðginin að koma fram í beinni útsend­ingu á Facebook-síð­unni „Hlynur Snær Theo­dór­son“.

„Við ákváðum að fara út í þetta í fyrra­haust og koma ekk­ert endi­lega reglu­lega fram en þó, það var oft einu sinni í viku á föstu­dags- eða laug­ar­dags­kvöldum og þá var ég með dætur mínar með mér. Við gáfum alltaf út til­kynn­ingar um hvenær við ætl­uðum að gera þetta og fólk gat sent inn óska­lög. Við­tök­urnar voru ótrú­lega góðar og við fengum góð við­brögð. Guðlaug Björk, konan mín, var titluð „útsend­inga­stjóri“ og hún tók niður það sem fólk var að senda inn og lét okkur hafa litla „post it miða“ með óska­lögum og reyndum við að taka öll óska­lög sem komu. Við reyndum að hafa þetta eins heim­il­is­legt og frjáls­legt og við gátum því að þetta var ekk­ert kostað. Við gátum gert nákvæm­lega það sem okkur lang­aði til að gera.“ Hlynur Snær gerir ráð fyrir að þau feðginin verði í haust og vetur með beinar útsend­ingar á Facebook-síð­unni.

Um síð­ustu helgi komu feðginin fram í fimm­tugs­af­mæli og fóru allir í Covid-hrað­próf áður en veislan hófst. „Þetta var mjög fag­mann­lega gert. Það var hjúkr­un­ar­fræð­ingur í alklæðn­aði – með grímu og skjöld – sem gerði þetta og svo var beðið í kortér til 20 mín­útur eftir nið­ur­stöðum og það reynd­ust allir vera nei­kvæðir. Svo voru allir rosa­lega slakir og skemmtu sér vel. Þetta var í fyrsta skipti í far­aldr­inum sem ég fór í „test“.“

Lögin sem spiluð eru og sungin eru allt frá „gömlu döns­unum“ upp í Queen og allt þar á milli. Hvert er upp­á­halds­lagið? „Ég veit ekki hvort ég eigi að velja eitt­hvað eitt lag en okkur finnst gaman að taka lagið hans Meat Loaf „Paradise by the Das­h­bo­ard Light“ sem vekur yfir­leitt mikla lukku. Svo er líka gaman að takast á við ný lög sem eru að koma út með hinum og þessum og læra þau og reyna að flytja þau almenni­lega.“

Það er ekki bara á Íslandi sem trú­bador­inn hefur komið fram heldur hefur hann komið fram meðal ann­ars á hesta­manna­mótum svo sem í Þýska­landi og Belgíu. „Það er óskap­legt ævin­týri.“

Svo semur hann sjálfur. Hann samdi til dæmis lagið „Bræðra­lag“ fyrir Karlakór Rang­æ­inga fyrir mörgum árum, svo samdi hann lagið „Fjalla­draumur“ fyrir Öðling­ana, hann samdi lagið „Eyðum ævinni saman“ fyrir eig­in­kon­una í til­efni fer­tugs­af­mælis hennar og í fyrra­vetur kom út lagið „Gleð­innar dans“. Nýjustu lögin eru hesta­manna­lagið „Töltið“ og ást­ar­lagið „Gullið mitt“ sem var samið til kon­unnar þegar hún varð 50 ára í mars. Lögin er hægt að hlusta á á ann­að­hvort YouTube eða Spotify. Hvað með stíl­inn þegar hann semur? Áherslur? „Ég myndi halda að þetta væri létt­leik­andi popp og aðeins út í kán­trí.“

Hann dreymir um að gefa út geisla­disk með lög­unum sínum. „Það eru alltaf að bæt­ast lög við safnið en ég er ekki búinn að safna nógu mörgum lögum til að gefa út geisla­disk eða plötu. Ég hef verið að vinna með Vigni Snæ, sem er kenndur við Írafár, og hann hefur verið að taka upp með mér lög sem eru komin á YouTube og Spotify.“

Tón­listin er auka­bú­grein bónd­ans. Syngur hann í fjós­inu? „Já, ég geri það stundum og kannski sér­stak­lega ef það koma litlir hópar að skoða fjósið. Svo syng ég iðu­lega í fjós­inu ef ég þarf að læra ein­hvern texta eða ný lög. Það er virki­lega góður staður til að æfa sig á og kýrnar eru orðnar vanar þessu. Þær þekkja orðið gaulið í karl­inum. Yngri kýrnar sem eru ekki orðnar vanar þessu fara í smá­baklás en jafna sig mjög fljótt; þá standa þær stjarfar og horfa á mig.“

Hver er draumur bónd­ans og trú­badors­ins hvað tón­list­ina áhrærir? „Draum­ur­inn er að starfa við þetta líka því þetta er virki­lega skemmti­leg og gef­andi. Ég er gríð­ar­lega þakk­látur að hafa dætur mínar með í þessu en mér finnst það vera for­rétt­indi að fá að vera svona mikið með börn­unum mínum í því sem mér finnst vera gaman að gera. Þannig að það er eig­in­lega drauma­staða að fá að vera með þeim.“