Jónína Freyja tekur upp hanskann fyrir afbrotamenn, sama hvert brot þeirra eru og vill koma af stað umræðu um málið. „Við þurfum alltaf að sýna fólki virðingu sama hvað þau gerðu eða hver þau eru,“ segir Jónína Freyja í myndbandi sem hún setti á Tik Tok reiknings sinn um helgina.
Þar er Jónína að tala um myndband sem tekið var af Gunnari Rúnari Sigurbjörnssyni sem fékk dóm fyrir morð. Gunnar varð Hannesi Helgasyni að bana með afar kaldrifjuðum og hrottafullum hætti árið 2010.
Myndbandið tók Patrik Snær Atlason, frændi Hannesar heitins, upp er hann var staddur í verslun Bónus á Granda og hitti þar Gunnar. Patrik dró upp síma sinn og tók upp myndband af hittingnum og birti það á Instagram-síðu sinni. Myndbandið fór víða um netheima í kjölfarið og var frændanum greinilega brugðið við að hitta morðingjann í Bónus. Sagði hann Gunnar meðal annars vera ógeðslegan.
Jónína var ekki hrifin af birtingu myndbandsins á samfélagsmiðlum og umræðunni sem þar skapaðist. „Kommentin eru jafnvel verri en myndbandið,“segir Jónína en þar tjáir fólk tilfinningar sínar á mismunandi hátt.
„Sama hvort þeir eru dæmdir barnaníðingar, morðingjar eða bara eitthvað allt annað, þetta eru samt menn með tilfinningar sem eiga fjölskyldu og vini rétt eins og við“.
Myndbandið sem Jónína setti inn hjá sér hefur vakið hörð viðbrögð og eru margir reiðir og ósammála henni. Myndbandið má sjá í heild sinni hér að neðan.
Athugasemdir