Svo virðist sem lögreglan á höfuðborgarsvæðinu hafi haft nóg að gera í nótt miðað við dagbók lögreglunnar.
Meðal annars var ekið á unga stúlku á reiðhjóli við gangbraut í Garðabæ á sjöunda tímanum í gær. Ökumaður hafði stöðvað fyrir stúlku en tók ekki eftir því að önnur kom aðvífandi og keyrði af stað með fyrrgreindum afleiðingum.
Stúlkan var flutt með sjúkrabíl á bráðamóttöku, en samkvæmt upplýsingum lögreglu gat stúlkan gengið óstudd. Hún var hinsvegar með höfuðverk og fann til í öðrum fætinum.
Bíll klessti á bensíndælur á Atlantsolíu á Sprengisandi. Engan sakaði, en þurfti dráttarbíl til að fjarlægja bæði bifreiðina og bensíndæluna.
Þá þurfti íbúi í miðbæ Reykjavíkur að kalla eftir aðstoð lögreglu eftir að hafa fundið ókunnugan mann sofandi í íbúð sinni í nótt.
Maðurinn var afar ölvaður og lá sofandi, fáklæddur í sófa í íbúðinni. Vísaði lögreglan ringluðum manninum út, sem virtist hvorki gera sér grein fyrir hvar hann væri staddur, né hvernig hann hafi komist þangað.
Tilkynnt var um tvö rafskútuslys. Í öðru þeirra var ung kona á ferð í miðbænum, en hún missti meðvitund í skamma stund og var flutt á sjúkrahús til aðhlynningar.
Alls voru 130 mál bókuð hjá lögreglunni og voru mörg þeirra vegna hávaða í heimahúsi.
Athugasemdir