Bloggarinn Páll undrast heiftina í sinn garð:„Látið eins og ég hafi framið einhvern þvílíkan glæp”

Blogg­færsla Páls Vil­hjálms­sonar um Helga Seljan hefur vakið upp mikil við­brögð. Mannlíf hafði sam­band við Pál og spurði hann út í málið, hvernig það liti út frá hans bæj­ar­dyrum séð.

„Mér finnst skrýtin þessi feikna­mikla heift sem virð­ist hafa gripið um sig þegar ég birti þetta; það er aðal­lega það sem kom mér á óvart; svo virð­ist í dag allt með kyrrum kjörum, en ég fékk það á til­finn­ing­una að ein­hver tauga­veiklun hafi gripið um sig þarna uppi í Efsta­leiti og stóru kanón­urnar voru dregnar fram; til dæmis for­seta­fram­bjóð­and­inn, Þóra Arn­órs­dóttir og Bogi Ágústs­son frétta­stjóri, en það er ekki á hverjum degi sem þau taka til máls á þessum vett­vangi.” 

Páll segir að málið hafi fyrst og fremst snú­ist „um það að Helgi Seljan sagði í þessum þætti á RÚV; sagði eitt­hvað um sjálfan sig, sem ég tengdi við það sem ég hef áður fjallað um. En mér finnst við­brögðin hafa verið öll meira og minna öll úr sam­hengi.”

Páll er eng­inn sér­stakur aðdá­andi frétta­stofu RÚV:

„Ég skil alveg að fólk and­mæli mér, en hvað kemur Bogi með? Hann segir að ég sé leigupenni; eins og ég sé í vinnu hjá Samherja að gera þetta, en ég held að Bogi sé það skyn­samur að hann veit að svo er ekki. Hann bara slær þessu fram og það er bara ómerki­legt.”

Páll segir að Bogi telji „sig vera að verja sinn mann og heiður stofn­un­ar­innar, en það er ekk­ert efn­is­lega farið í þetta og bara látið eins og ég hafi framið ein­hvern því­líkan glæp. Ég tók Helga bara á orð­inu, hann sagði að hann hefði farið inn á geð­deild og ég tengdi það við ann­ars vegar að vera veill á geði; ef maður er á geð­deild þá er það ekki út af bak­verkjum eða fót­broti.”

Hann nefnir að honum finn­ist margt athuga­vert við vinnu Helga „í þessu til­tekna máli sem er Samherja málið, þar sem mér fund­ust mjög und­ar­legir hlutir í gangi svo vægt sé tekið til orða – 2012 segir hann ákveðna hluti sem engar heim­ildir eru fyrir og allt varð­andi Helga og Samherja-málið í gegnum árin er mjög vafa­samt af hans hálfu.”

Páll seg­ist ein­fald­lega ekki hafa gert neitt „nema að vera með aðra teng­ingu heldur en teng­ing RÚV var, að Helgi ætti bágt og væri fórn­ar­lamb og ég bara kaupi það ekki. Það er allt í lagi að gagn­rýna mig fyrir að sýna honum ekki nægi­lega samúð, en svona lít ég á málið.

Helgi hefur farið offari í sínum frétta­flutn­ingi og vinnu­brögðum eins og ég hef rakið oft áður.”