Leikstjórinn góðkunni, Ágúst Guðmundsson, sem fært hefur okkur perlur á borð við Útlaginn, Með allt á hreinu, Nonna og Manna og Ófeigur gengur aftur, fann á dögunum algjöran fjársjóð uppi á háaloftinu heima hjá sér.
Ágúst fann kassettu frá níunda áratugnum í gömlum pappakassa en á henni var að finna hressilegt jólalag sem hann samdi ásamt Valgeiri Guðjónssyni, Stuðmanni með meiru. Lagið heitir Góðan dag og gleðileg jól! en segist Ágúst hafa farið beinustu leið með kassettuna í rafræna vinnslu. Þeir félagar hafa hug á því að gefa lagið út og gleðja þjóðina á þessum erfiðu Covid tímum.
Fréttablaðið fjallar um málið í dag.
Segir Ágúst lagið hafa verið tekið upp annað hvort árið 1984 eða 1985. Lagið var samið á sínum tíma sem partur af jólakvikmynd sem Ágúst hugðist gera. Hún átti að vera barnamynd þar sem jólasveinar áttu að koma við sögu. „Hún átti að vera full af einhverjum furðuverum úr íslenskri þjóðtrú,“ útskýrir leikstjórinn.
„Þegar ég hlustaði á lagið aftur þá fannst mér þetta nú talsvert fyndnara en mig minnti. Og það fannst Valgeiri reyndar líka. Þetta kom honum rosalega á óvart enda var hann alveg búinn að gleyma þessu,“ sagði Ágúst í samtalinu við Fréttablaðið.
Athugasemdir