Sjálfstæðismaðurinn og fyrrverandi bæjarstjóri á Seltjarnarnesi, Jónmundur Guðmarsson, var dæmdur fyrir „meiri háttar brot gegn skatta- og bókhaldslögum,“ – en svo segir í dómi Héraðsdóms Reykjaness.
Tildrög þessa máls eru þau að Jónmundur var eigandi samlagsfélagsins Polygon; voru skattframtöl félagsins fyrir árin 2014 til 2016 tekin til endurskoðunar, vegna þess sem talið er vera tilhæfulaus kostnaður sem færður hefði verið í reikninga félagsins, en í ákæru héraðssaksóknara sagði að rekstrargjöld hefðu verið oftalin; nam upphæðin 95 milljónum íslenskra króna.
Fyrrum bæjarstjórinn krafðist sýknu; til vara vægustu refsingar, og vísaði Jónmundur til þess að hann hefði haft frumkvæði að því að láta færa bókhald félagsins að nýju; leggja fram endurgerða ársreikninga sem og skattframtöl.
Engu að síður var niðurstaða dómsins sú „að við ákvörðun refsingar skuli leggja til grundvallar að offramtalin rekstrargjöld Polygon slf. á tímabili ákæru hafi numið 61.471.819 krónum.“
Einnig er rakið að ákærða hafi ekki áður verið gerð refsing; en að hann sé sakfelldur fyrir meiri háttar brot gegn skatta- og bókhaldslögum.
Jónmundi til málsbóta „horfir að hann hefur að langstærstum hluta játað brot sín og þá sýndi hann fulla samvinnu við rannsókn málsins.“
Hæfileg refsing var talin vera 7 mánaða skilorðsbundið fangelsi; sem fellur niður að tveimur árum liðnum, og Þá skuli Jónmundur greiða tæpar 67 milljónir íslenskra króna í sekt í ríkissjóð.
Athugasemdir