Kristinn gagnrýnir fjölmiðla: „Fleiri hafi fallið fyrir eigin hendi á Íslandi en látist úr covid“

Kristinn Hrafns­son, rit­stjóri Wikileaks skrif­aði í dag færslu á Facebook þar sem hann gagn­rýnir fjöl­miðla fyrir að ala á hræðsl­una við nýja Covid afbrigðið, Omikron. Bendir hann á fréttir frá vís­inda­mönnum í Hong Kong, máli sínu til stuðn­ings.

„Fyrir viku voru 24 á sjúkra­húsi með veiruna. Nú eru þeir 13. Til­fellum fjölgar samt jafnt og þétt. Nú ber­ast fréttir af því að nýtt afbrigði muni taka allt yfir enda marg­fallt meira smit­andi. Í gær bár­ust fréttir af því frá vís­inda­mönnum í Hong Kong að það væri miklu skaðminna en Delta – tífallt skaðminna – miðað við smit í vefjum lungna.

Þarna í frétt­unum kall­ast á tvö sjón­ar­mið. Annað vill að við höfum miklar áhyggjur, hitt að við séum að sjá þennan far­aldur fjara út og verða í raun á pari við hefð­bunda flensu (að því gefnu að fólk sé bólu­sett).Það er fyr­ir­sagna­efni þegar einn aldr­aður deyr úr covid. Það var aldrei fyr­ir­sögn áður þó aldrað fólk kveddi vist­ina vegna inflú­ensu. Það gerð­ist á hverju ári.Það er heldur ekki fyr­ir­sagna­efni að fleiri hafi fallið fyrir eigin hendi á Íslandi en lát­ist úr covid. Á síð­asta ári misstum við 47 manns­líf vegna sjálfs­víga – mest karl­menn á besta aldri.Engin vilji er samt til að opna veskið og gera rösk­legar úrbætur í geð­heil­brigð­is­málum.

Hvert viljum við horfa?“

Færslan hefur vakið mikla athygli en sitt sýn­ist hverjum.

Bubbi Morthens er sam­mála Kristni. „þetta er orðið galið hvernig hræðslu­á­róðri er haldið að okkur dag hvern og í fjöl­miðlum.“

Anna nokkur er hins vegar ósam­mála. „Omicron er mild­ari og sýnt þykir að það leiði til helm­ingi færri sjúkra­húsinn­lagna (að mig minnir 1% fremur en 2%). Það eru jákvæðu frétt­irnar. En omicron er marg­falt smit­næm­ari en delta sem þýðir að fari það um eins og eldur í sinu mun sjúkra­húsinn­lögnum snar­fjölga. Það eru nei­kvæðu frétt­irnar. Fólk verður að nota á sér topp­stykkið.“

Vern­harður kemur með góðan punkt. „Allt rétt en það má þó benda á að dauðs­föll eru til­tölu­lega fá sem hlut­fall smit­aðra meðan heil­brigð­is­kerfið annar far­aldr­inum en ef farið er yfir þol­mörk þess þá getur orðið marg­földun í fjölda dauðs­falla.“