Kristbjörg Kjeld talar ekki um aldur sinn: „Ég bara get það ekki”

Krist­björg Kjeld er 86 ára leik­kona en hún lætur ald­ur­inn ekki stoppa sig í leik­list­inni. Hún leikur nú í verk­inu „Er ég mamma mín?“ ásamt því að æfa fyrir tvö önnur verk og aðal­hlut­verk í verki sem verður sett á svið árið 2023.

Hún seg­ist lifa í núinu og geti lítið verið að hugsa um háan aldur: „Nei, í alvöru, ef maður væri alltaf að tala um hvað maður væri gam­all? Ég bara get það ekki. Það er bara ekki í mér.“

Krist­björg hefur starfað í sjö­tíu ár sem leik­kona og sagði í við­tali við Frétta­blaðið að hún væri alltaf með sviðs­skrekk fyrir sýn­ingar:

„Ég er alltaf drullu­stressuð fyrir sýn­ingar og það hefur ekk­ert lag­ast með tím­anum. Svo nú þegar maður eld­ist bæt­ist við ótt­inn við að gleyma text­anum. Ég er þó ekki eins og sumir sem hrein­lega kasta upp af stressi. Stressið kemur áður en maður fer inn á sviðið en svo er það búið þegar maður er þangað kom­inn. En vinnan gefur manni svo mikið, ann­ars væri maður ekki að þessu, maður er ekki bara að pína sig. Það gefur manni líka mikið að sigr­ast á áskor­unum.“

Krist­björg lauk form­lega störfum hjá Þjóð­leik­hús­inu árið 2005, þá komin á eft­ir­laun, hún var fast­ráðin þar frá árinu 1956. 16 ár eru liðin síðan en hún er langt frá því að vera hætt.

„Það hefur bara verið svo mikið að gera síðan þá. Ég man að þegar ég var að hætta í Þjóð­leik­hús­inu var ég spurð út í til­finn­ing­una og ég svar­aði gal­vösk: „Þetta er bara dásam­legt, nú er ég fríl­ans.“