Í gær var blaðamanninum Margréti Friðriksdóttur vísað út úr verslun H&M í Kringlunni fyrir að vera ekki með grímu.
Tvær dætur hennar voru með móður sinni og segir Margrét að dætrunum hafi verið mjög brugðið vegna þessa atviks.
Áðurnefnd Margrét ræddi málið í samtali við Fréttablaðið en hún var líkt og margir jólagjafainnkaupum þegar öryggisvörður frá Securitas kom upp að þeim og sagði Margréti að það væri grímuskylda:
„Hann bendir mér á að ég eigi að vera með grímu og ég segi við hann: „Farið þið ekki eftir sóttvarnarreglum? Það er ekki grímuskylda nema eins metra reglan náist ekki.“ Þetta stendur bara skýrt í lögunum, þetta á við nuddstofur, hárgreiðslustofur og þess háttar, þetta á ekki við í stærri rýmum.“
Hún færir í tal að stuttu síðar hafi öryggisvörðurinn komið aftur með sex kollegum sínum og þeir gert sig líklega til að vísa þeim út úr búðinni:
„Dóttir mín er fimmtán ára og hún verður bara mjög skelkuð af því þeir umlykja mig allir, í þessum búningum sínum, og ég bendi þeim aftur á að þetta séu sóttvarnarreglurnar. Þá segja þeir að þeir séu að vinna fyrir H&M og það séu sérreglur í H&M.“
Margrét fór út úr búðinni stuttu síðar og segir að öryggisverðirnir hafi elt hana og dætur hennar.
Þá ákvað Margrét að hringja á lögregluna og komu lögregluþjónar á staðinn stuttu síðar.
Margrét segist hafa sýnt lögreglunni sóttvarnarreglurnar sem eru í gildi til 22. desember:
„Þeir voru bara sammála mér: „Þetta er rétt hjá þér Margrét, þú ert ekkert að brjóta nein lög og reglur hér“ og svo ræddu þeir við þá og svo aftur við mig og tóku skýrslu,“ segir Margrét sem hyggst kæra málið til lögreglu í dag; kallar eftir upptökum úr öryggismyndavélum.
Margrét er ekki þekkt fyrir að láta vaða yfir sig og nokkuð ljóst að einhver eftirmál verða af þessu atviki.
Athugasemdir