„Þetta var það versta sem ég varð vitni að – Hvergi á síðunni var minnst á blóðtöku hesta“

„Þetta var það versta sem ég varð vitni að.“

Segir Ali Shearman, banda­rísk kona í sam­tali við Frétta­blaðið. Ali var meðal sjö erlendra sjálf­boða­liða sem aðstoð­uðu við blóð­töku á bæ á Suð­ur­landi. Þau voru öll ráðin í gegnum vef­síð­una Workaway .

Hún vann í ólög­legri sjálf­boða­vinnu á blóð­tökubæ nálægt Hvols­velli árið 2017 og segir að dýra­læknir hafa sleppt því að hreinsa og binda um djúpan skurð á lend blóð­merar sem hafði slasast í blóð­töku­bási.

Bóndi hafi sagst ætla að senda fjórar fyl­fullar hryssur sem létu illa við blóð­töku, beint í slátrun.

„Við skráðum okkur svo sann­ar­lega ekki í þessa vinnu. Við sömdum um að búa hjá gest­gjaf­anum okkar og vinna í garð­inum hennar. Hvergi á síð­unni var minnst á blóð­töku hesta og þess var aldrei getið í neinum skila­boðum áður en við lögðum af stað til Íslands,“ útskýrir Ali.

„Mér finnst aug­ljóst að til­gangur bónd­ans við að fá okkur til vinnu var að spara pen­ing. Það var ódýr­ara að hafa sjö manns í mat og gist­ingu en að hafa sjö starfs­menn á launum.“

Hryssurnar sýndu merki um streitu þegar dýralæknirinn mætti

Ali segir að versta til­fellið sem hún varð vitni var þegar bónd­inn stakk óvart hryssu í lend­ina með odd­hvössu járn­priki.

„Prikið flækt­ist svo í tagl­inu á hest­inum og það tók nokkrar mín­útur að losa prikið.“

Bóndinn hafi full­vissað sjálf­boða­lið­ana að dýra­lækn­ir­inn myndi líta á sárið en Ali tók eftir að skurð­ur­inn var nokkuð djúpur.

Þegar dýra­lækn­ir­inn mætti á svæðið fór blóð­takan fram eins og venju­lega. Að sögn Ali leit dýra­lækn­ir­inn rétt svo á sárið og sleppti henni svo að lok­inni blóð­töku. Sárið var enn opið og blóðið var ekki búið að storkna. Þá mátti sjá blóðslóð eftir hryss­una á tún­inu.

Hægt er að lesa við­talið í heild sinn hér.