Fiskikóngurinn: „Meiri líkur á að fá geimskip í hausinn en að veikjast eftir að hafa borðað fisk“

„Sala á fiski hefur hrunið niður, eftir umfjöllun RÚV um hringorma. Það eru meiri líkur á að fá lottovinn­ing, eða geim­skip í haus­inn en að veikj­ast eftir að hafa borðað fisk.“ Þetta segir Kristján Berg, eig­andi Fiski­kóngs­ins í færslu á Facebpook-síðu sinni í dag.

Lifandi hringormar finnast í fólki á hverju ári

RÚV sagði frá því á dög­unum að á hverju ári finnd­ust lif­andi hringormar í fólki og að dæmi væru um að þeir gætu valdið miklum skaða. Sagt var frá því að einn slíkur hefði fund­ist í bleyju barns. Karl Skírn­is­son, sníkju­dýra­fræð­ingur, sagði í sam­tali við RÚV að orm­arnir kæmu að öllu jöfnu úr þorsk­fiskum, síld eða upp­sjáv­ar­fiskum. Í gær var greint frá því að Mat­væla­stofnun ber­ist nú fleiri til­kynn­ingar en áður um lif­andi hringorma í fiski. Verk­efna­stjóri sagði það lík­lega tengj­ast breyttum neyslu­venjum.

Umræðan til þess fallin að fólk sæki meira í skyndibita

Kristján Berg hefur marga fjör­una sopið þegar kemur að fiski. Hann vandar rík­is­fjöl­miðl­inum ekki kveðj­urnar.

„Þessi umræða er til þess fallin að fólk sæk­ist meira í skyndi­bita­mat. Eitthvað sem íslenska þjóðin þarf ekki á að halda. Við eigum ferskan fisk, íslenska villi­bráð, sem syndir allt í kringum landið. Er hægt að borða meiri gæði, betri mat en íslenskan ferskan fisk. Ef svo er, þá þætti mér vænt um að heyra hvaða ofur­fæði það er.

RÚV er alveg að gera uppá bak í frétta­flutn­ingi. Það er annað hvort fréttir af Land­spít­al­anum sem er í fréttum, nei­kvæðar fréttir (er ekki hissa á að fólk vilji ekki vinna þar, þar sem það eru stans­lausar leið­inda­fréttir þaðan, 95% af þeim eru nei­kvæðar). Eða þá fréttir af kindum/rollum eða dýrum, ein­hver krús­í­björn að leika sér í snjó í dýra­garði, eða rolla sem er með 4 horn.“

Kominn tími til að styðja við íslenska framleiðslu

Kristján seg­ist halda að RÚV ætti að taka sig saman í and­lit­inu og birta jákvæðar fréttir.

„Núna er kom­inn tími til þess að snúa blað­inu við. Borða holla íslenska fæðu, hætta að flytja inn alls konar drasl mat­vöru og styðja við íslenska fram­leiðslu. Íslenskur fiskur á að vera þar efstur á blaði. Verð­bólgan færi þá kannski líka aðeins niður, þannig að þetta er WIN WIN dæmi.

Eins og fram kom í fréttum um dag­inn, þá er áunnin syk­ur­sýki orðið vanda­mál. Get full­vissað ykkur um að þið fáið ekki áunna syk­ur­sýki við að borða ferskan íslenskan fisk.

Nr. 2: Íslenskur fiskur er ekki nið­ur­greiddur eins og lamba­kjötið, þar eru rík­is­styrkir til bænda nokkrir millj­arðar á ári.“

„Við sem seljum fisk, þætti vænt um að við fengjum þessa styrki, þó svo það væri ekki nema í eitt ár. Það þætti okkur sann­gjarnt. Þetta er orðið gott,“ segir Kristján Berg að lokum.