Lilja Alfreðsdóttir, viðskiptaráðherra, segir að bönkunum beri að létta undir með heimilum landsins með því að greiða niður vexti. Þetta rökstyður hún með því að bankarnir séu að skila miklum hagnaði.
„Bankanir eru að skila ofurhagnaði og hagnaður þeirra verður meiri í kjölfar stýrivaxtahækkana Seðlabanka Íslands. Ég tel að það eigi að nota þennan ofurhagnað til að greiða niður vexti fólksins í landinu,“ sagði Lilja í samtali við Morgunblaðið.
Heimilin í landinu horfa nú fram á æ hærri greiðslubyrði á lánum sínum vegna tíðra stýrivaxtahækkana Seðlabanka Íslands. Viðskiptabankarnir hafa hækkað vexti sína samhliða hækkunum stýrivaxta.
Lilja nefnir sem dæmi að Landsbankinn hafi skilað 30 milljarða króna hagnaði í fyrra. Eignaverð hafi hækkað töluvert í Covid-19 faraldrinum, bæði hlutabréf og fasteignir, og við þær aðstæður sé sannarlega ekki óeðlilegt að bankar skili miklum hagnaði. Hún segir þó að um sé að ræða ofurhagnað og að henni þyki borðleggjandi að við jöfnum byrðarnar til þess að við sem samfélag komum vel út úr faraldrinum.
Lilja segir afar mikilvægt að ákveðin heimili „sitji ekki eftir með Svarta Pétur“ í kjölfar mikilla vaxtahækkana. Nefnir hún þar sérstaklega heimili ungs fólks og tekjulágra. Hún segir helst þurfa að horfa til þeirra heimila sem mest skulda, enda sé vaxtabyrði þeirra þyngst. Lilja nefnir einnig ferðaþjónustufyrirtæki, sem hafi komið illa út úr faraldrinum. Hún segir bankana þurfa að stíga inn í og huga að heimilunum í landinu. Geri þeir það ekki sé ekki útilokað að endurvekja bankaskattinn.
Athugasemdir