Karen segist hafa sent gögnin frá Creditinfo í trúnaði: „Mér finnst búið að snúa út úr þessu“

Karen Elísabet Hall­dórs­dóttir, sem sæk­ist eftir því að leiða Sjálf­stæð­is­flokk­inn í Kópavogi, seg­ist ekk­ert erindi hafa fengið frá Per­sónu­vernd vegna dreif­ingar á upp­lýs­ingum frá Creditinfo, um skulda­stöðu trún­að­ar­manns innan flokks­ins. Hún telur sér­stakt að málið sé dregið fram á þessum tíma­punkti, rétt fyrir próf­kjör.

Vísir greindi frá mál­inu í morgun. Þar segir að Karen hafi verið kærð til Per­sónu­verndar af téðum trún­að­ar­manni vegna dreif­ingar á gögnum um hann. Á Vísi er það reifað hvernig Sveinn Andri Sveins­son, lög­maður, hafi flett við­kom­andi trún­að­ar­manni upp hjá Credit Info, að beiðni Halldórs Jóns­sonar, umbjóð­anda Sveins Andra og föður Karenar. Halldór hafi síðan komið gögn­unum til Karenar sem hafi því næst dreift þeim áfram.

Segir rangt að tala um dreifingu

Karen segir í sam­tali við Mannlíf ákveðna rang­færslu fel­ast í því að tala um dreif­ingu gagn­anna. „Þetta lýtur að hlut­höfum og stjórn í félagi og ég er sjálf hlut­hafi. Ég sendi í raun­inni upp­lýs­ingar á þeim grund­velli, á trún­að­ar­menn. Svo er, að mér finnst, svo­lítið búið að snúa út úr þessu. Enda sjáum við að tíma­setn­ingin er dálítið áhuga­verð, eins og lög­mað­ur­inn minn bendir á.“

Lögmaður Karenar er Ómar R. Valdi­mars­son. Hann sagði í sam­tali við Vísi að því væri „alfarið hafnað að Karen hafi brotið gegn rétt­indum þessa til­tekna ein­stak­lings.“ Hann vakti athygli á því að verið væri að draga málið fram á þessum tíma­punkti, rétt fyrir próf­kjör Sjálf­stæð­is­flokks­ins í Kópavogi, en málið kom upp í ágúst á síð­asta ári.

Trún­að­ar­mað­ur­inn sem um ræðir var á van­skila­skrá og á Vísi segir að málið hafi snú­ist um það hvort hann væri hæfur til þess að sitja í stjórn félags sem hefur ákveðin umráð yfir eignum Sjálf­stæð­is­flokks­ins í Kópavogi.

Creditinfo telur brotið gegn skilmálum

Creditinfo hefur nú sent Per­sónu­vernd bréf vegna máls­ins. Fyr­ir­tækið telur Svein Andra hafa brotið gegn áskrift­ar­skil­málum fyr­ir­tæk­is­ins og hefur aðgangi hans nú verið lokað vegna mis­notk­unar. Er það vegna þess að Sveinn Andri hafi ekki getað gefið full­nægj­andi skýr­ingar á þeim meintu lög­vörðu hags­munum sem lágu að baki upp­flett­ing­unni og afhend­ingu gagn­anna til Halldórs Jóns­sonar.

Halldór, faðir Karenar, er verk­fræð­ingur og bæði með­stjórn­andi og eig­andi Þorra ehf. fast­eigna­fé­lags. Hann hefur löngum verið áhrifa­maður í stjórn­málum í Kópavogi. Hann er gjarnan kenndur við Mogga­blogg, en þar hefur hann birt hina ýmsu umdeildu pistla. Sveinn Andri kom gögn­unum frá Creditinfo til Halldórs, umbjóð­anda síns, að beiðni þess síð­ar­nefnda, á þeim grund­velli að gögnin ættu erindi við almenn­ing.

Karen er í hörðum slag um odd­vita­sæti Sjálf­stæð­is­manna í Kópavogi við mótherja sinn, Ásdísi Krist­jáns­dóttur. Sú síð­ar­nefnda er aðstoð­ar­fram­kvæmda­stjóri Samtaka atvinnu­lífs­ins. Á Vísi er sagt frá því að ein­stak­ling­ur­inn sem telur Kareni hafa brotið á sér með dreif­ingu gagn­anna frá Creditinfo sé í stuðn­ings­manna­liði Ásdísar og hafi gegnt hinum ýmsu trún­að­ar­störfum innan Sjálf­stæð­is­fé­lags­ins í Kópavogi.

Sveinn Andri Sveins­son lög­maður. Mynd/ Rakel Ósk Sig­urð­ar­dóttir

Hefur ekki fengið tilkynningu frá Persónuvernd

Karen seg­ist í sam­tali við Mannlíf ekki viss um að það sé rétti tím­inn til þess að tjá sig efn­is­lega um málið á þessum tíma­punkti, rétt fyrir próf­kjör. „Ég mun kannski frekar stíga fram þegar því er lokið, með þá feril máls­ins og sög­una af því öllu.“

„Ég er hlut­hafi og sendi í trún­aði upp­lýs­ingar á stjórn. Við mig er þá aug­ljós­lega ekki hald­inn trún­aður. Ég tel mig vera ábyrgan hlut­hafa. Svo er þessu snúið upp í þetta núna, korter í kosn­ingar. Mér finnst það sér­stakt. Ég tel að það sé ekki rétt að vera að fara í málið í heild sinni á þessum tíma­punkti,“ segir hún.

Karen heldur áfram. „Ég tel það mik­il­vægt, í ljósi fyr­ir­sagnar á Vísi, að taka það fram að ég hef ekki fengið neina til­kynn­ingu frá Per­sónu­vernd.“

Aðspurð hvort hún hafi sann­ar­lega talið upp­lýs­ing­arnar um trún­að­ar­mann­inn eiga erindi við almenn­ing áréttar Karen að hún hafi sent þær á trún­að­ar­menn. „Bara í trún­aði. Síðan fer þetta svona.“