„Markmið mitt er að vera mín eigin fyrirmynd og vera þekkt af góðu. Auk þess að vera mamma dásamlegra barna minna og eiginkona Ara míns, þá er Fanney í dag ekki sú sama og Fanney fyrir fimm árum. Fanney fyrir fimm árum var t.d. oft reiðari og hræddari en Fanney í dag. Lífið er jú alls konar og við erum alltaf að mótast í takt við þær áskoranir og uppákomur sem lífið færir okkur,“ segir Fanney Marín Magnúsdóttir, eigandi heilsu- og samfélagssíðunnar Mín Leið Upp.
„Mín Leið Upp er hugmynd sem fæddist eina andvökunótt og varð til samhliða BA-ritgerðinni minni. Markmið mitt var að búa til vettvang sem ég hefði vilja hafa aðgang að þegar ég tók mín fyrstu skref á leið minni upp. Vettvangur þar sem við getum aðstoðað hvert annað á okkar leið upp.
Ég var hikandi og feimin fyrst, en byrjaði að setja #minleidupp á Instagram og þá fór boltinn að rúlla.“
Reynslusögur ólíkra
Á heimasíðunnni er hægt að nálgast reynslusögur ólíkra reynslubolta og verkfærakistu sem leiðir fólk áfram í sjálfsvinnu og hún segir okkur að það hafi glatt hana óskaplega þegar hún heyrði af kennara sem hvatti nemendur sína til að fara á heimasíðuna og nýta sér verkfærakistuna.
Mín Leið Upp er einnig með vefverslun sem vex og dafnar. Í henni eru m.a. til sölu skartgripir og bækur sem hún sjálf hannar og lætur gera fyrir sig.
Stemmingin er létt og vinaleg
„Við Karlotta Ósk Jónsdóttir, vinkona mín, fórum af stað með hlaðvarpið „Saumaklúbburinn“ þann 17. nóvember 2021 og eru þættirnir nú orðnir 17 talsins.
Saumaklúbburinn er hlaðvarp fyrir konur, þó svo að við höfum áreiðanlegar heimildir fyrir því að það séu karlar þarna úti sem hafa lúmskt gaman af því að hlusta líka.“
Hlustendahópurinn er á mjög breiðu aldursbili en markhópurinn er 35 ára og eldri.
Í Saumaklúbbnum er spjallað um allt sem tengist því að vera kona, móðir og eiginkona og rætt er af einlægni um þær skyldur og áskoranir sem konur eru að takast á við hverju sinni.
alveg eins og alvöru, góður saumaklúbbur
„Stemmingin er létt og vinaleg, mikið hlegið en líka alveg stundum grátið. Einnig fáum við reglulega til okkar gesti sem hafa sögur að segja, bæði landsþekkta og ekki.“
Það kemur alltaf nýr þáttur út á mánudögum og fara upptökurnar fram í kósíheitum í sófanum heima hjá Karlottu, alveg eins og alvöru, góður saumaklúbbur.
Vinkonur sem ég get grátið og hlegið með
Helsta áskorun Fanneyjar hefur verið að finna þetta vandfundna, gullna jafnvægi í daglegu einkalífi og starfi og muna eftir sjálfri sér í leiðinni.
Það koma auðvitað á milli, minna hressilegir dagar
„Undanfarin fimm ár hafa verið krefjandi. Að halda saman námi, styðja við drenginn minn, sem spilar fótbolta í Englandi, sinna heimili og börnum á Íslandi, finna tíma fyrir eiginmanninn, vinna að Mín Leið Upp og vera til staðar fyrir vini og fjölskyldu hefur vissulega verið krefjandi, en yfirleitt hrikalega skemmtilegt.
Það kom mér á óvart hvað það hefur tekist vel að halda öllum boltum á lofti og skipuleggja mig, án þess að finnast ég vera stöðugt á örmögnunarstigi og vera í rauninni frekar hress flesta daga. Það koma auðvitað á milli minna hressilegir dagar og þá er ég bara minna hress í smá tíma og leyfi mér það.
En þetta mikla púsl myndi auðvitað ekki ganga upp nema með aðstoð góðra vina og fjölskyldu. Ein af stærstu áskorununum þegar kemur að Mín Leið Upp er eflaust vinnan í kringum heimasíðuna sjálfa en þar hafa Thury Hannesdóttir og maðurinn minn reynst mér einstaklega vel.
Ég á ómetanlegar vinkonur sem ég get grátið og hlegið með og við grípum hver aðra til skiptis. Mamma hefur líka einstakt lag á að hvetja mig áfram og hjálpa mér að finna sjálfsöryggið í því sem ég er að gera og hjálpar mér að taka rökréttar ákvarðanir.“
Lífið er gott
„Næst á döfinni hjá mér er að halda áfram með með Mín Leið Upp, en það hefur gengið vel og það gerir hlaðvarpið okkar Karlottu, „Saumaklúbburinn“, líka. Ég er komin í gott samstarf við aðila sem vinna með mér að sjálfstyrkingarnámskeiði „Minnar Leiðar Upp,“ en ég vinn einnig að fyrirlestraröð sem snýst um að vera sín eigin fyrirmynd.
Lífið er frekar gott sjáðu til.“
Athugasemdir