Starfsfólk Eflingar fékk uppsagnarbréf í nótt: „Staðið hefur verið rétt og faglega að ferlinu“

Starfs­fólki á skrif­stofu Eflingar barst form­legt upp­sagn­ar­bréf klukkan tvö í nótt. RÚV greinir frá þessu.

Í bréf­inu kemur fram að ástæða upp­sagn­ar­innar sé skipu­lags- og rekstr­ar­breyt­ingar sem nái til allra stöðu­gilda hjá stétt­ar­fé­lag­inu.

Í bréf­inu segir enn­fremur að ný störf hjá Eflingu verði aug­lýst og er við­tak­andi hvattur til að sækja um. Upp­sagn­ar­frestur er sagður í sam­ræmi við ráðn­ing­ar­samn­ing við­kom­andi og við­eig­andi kjara­samn­ing. Óskað er eftir að við­tak­andi bréfs sinni vinnu­skyldu á upp­sagn­ar­tíma.

Hóp­upp­sögnin á skrif­stofu Eflingar hefur verið gagn­rýnd harð­lega innan verka­lýðs­hreyf­ing­ar­innar. Drífa Snædal, for­seti ASÍ, hefur til að mynda sagt verka­lýðs­hreyf­ing­una hafa unnið hart að því í fjölda­mörg ár að hóp­upp­sagnir af þessu tagi ættu sér ekki stað.

Í nýrri yfir­lýs­ingu frá Sólveigu Önnu seg­ist hún ánægð með að sam­ráð við trún­að­ar­menn hafi skilað sér í sam­komu­lagi. Það sam­komu­lag felur meðal ann­ars í sér að starfs­fólk geti farið í atvinnu­við­töl á vinnu­tíma og að Efling muni falla frá samn­ings­bundnum upp­sagn­ar­fresti við­kom­andi starfs­manns, fái hann starf ann­ars­staðar.

„Ég lýsi ánægju með að sam­ráð við trún­að­ar­menn hafi skilað sér í sam­komu­lagi. Staðið hefur verið rétt og fag­lega að ferl­inu. Það er hins vegar mjög leitt að minni­hluti stjórnar hafi ekki virt trúnað og kosið að leka upp­lýs­ingum í fjöl­miðla meðan á sam­ráði stóð,“ segir í til­kynn­ingu Sól­veigar Önnu.

„Van­stillt umræða hefur svo farið úr bönd­unum síð­ustu sól­ar­hringa þar sem ýmsir hafa sett sig á háan hest án þess að vita nokkuð um málið. Er það engum til sóma,“ segir hún enn­fremur.