Mark Zuckerberg, stofnandi Facebook, kom til Íslands þann 17. maí með eiginkonu sinni Priscilla Chan. Þau komu með einkaflugvél sem lenti á flugvellinum á Akureyri. Af myndunum að dæma sem hann deildi á samfélagsmiðlinum í kvöld, virðast þau hafa vel notið dvalarinnar á Íslandi.
Zuckerberg sagði í athugasemd við færslu með auglýsingu Inspired by Iceland í nóvember á síðasta ári að hann hlakki til að heimsækja „Icelandverse“ bráðlega og má því vera að hann hafi láti verða af því.
Í umræddri auglýsingu fór leikarinn Jörundur Ragnarsson með hlutverk manns, sem svipaði mjög til Zuckerberg, og var að kynna „Icelandverse“. Með auglýsingunni var augljóslega verið að vísa í nýlegri kynningu Zuckerbergs á „metaverse“.
Hjónin tóku þyrlu að Deplum í Fljótum sem er vinsæll dvalarstaður þeirra sem hafa nóg á milli handanna.
Birti Zuckerberg fjórar myndir á Facebook-síðu sinni. Tvær eru teknar að Deplum, þar sem þau Chan eru á skíðum, að njóta sín í heitum potti og fyrir utan hótelið.
Á Deplum er vinsælt að fá far upp á fjallstopp með þyrlu og renna sér svo niður.
Lúxusferðaþjónustan að Deplum er í eigu Eleven Experience og hefur verið rekin í tæpan áratug. Fjölmargir heimsþekktir og auðugir erlendir aðilar hafa dvalið að Deplum. Má nefna Hollywood-leikarann Tom Cruise og Jürgen Klopp, knattspyrnustjóra Liverpool.
Athugasemdir