Eitt og annað bar á góma í nótt samkvæmt dagbók lögreglu þó nóttin hafi verið ívið rólegri en nóttin þar á undan.
Í Miðbænum var tilkynnt um húsbrot og eignaspjöll í gærkvöldi. Maður var sagður hafa ruðst inn í íbúðarhúsnæði og lagt þar allt í rúst. Var hann sagður hafa brotið tvær rúður og yfirgefði síðan íbúðina. Í íbúðinni var kona með börn og náði hún að komast inn í herbergi og læsa.
Tilkynnt var um umferðisslys í miðbænum en þá hafði bifreið verið ekið á hjólreiðamann og ökumaðurinn flúið vettvanginn. Að sögn vitna hafði ökumaðurinn verið að þenja bifreiðina og flauta áður en hann ók á reiðhjólamanninn. Datt reiðhjólamaðurinn í götuna og var bifreiðinni ekið á hjólið. Ekki er getið um áverka en hjólreiðamaðurinn afþakkaði sjúkrabifreið á vettvangi. Málið er í rannsókn.
Í hverfi 104 voru afskipti höfð af ökumanni bifreiðar og var hann handtekinn grunaður um akstur undir áhrifum fíkniefna og fyrir vörslu fíkniefna. Var hann vistaður í fangageymslu lögreglu fyrir rannsókn málsins.
Í miðbænum var bifreið stöðvuð og reyndist ökumaðurinn vera sviptur ökuréttindum. Um það bil klukkustund síðar var sami maður stöðvaður í sama hverfi og var þá kærður fyrir að aka yfir gatnamót gegn rauðu ljósi og akstur án réttinda.
Þó nokkrir ökumenn voru stöðvaðir fyrir akstur undir áhrifum fíkniefna eða áfengis.
Þá datt maður af rafmagnshlaupahjóli í Breiðholtinu. Var maðurinn talsvert kvalinn og gat lítið tjáð sig. Var hann fluttur með sjúkrabifreið á Bráðadeild til aðhlynningar.
Í Breiðholtinu var ráðist á mann á bar og var hann fluttur með sjúkrabifreið til aðhlynningar á Bráðadeild. Var árásaraðilinn handtekinn og vistaður í fangageymslu lögreglu.
Á Breiðholtsbraut var bifreið stöðvuð en ökumaðurinn reyndist vera aðeins 16 ára og hefur því aldrei öðlast ökuréttindi. Var málið tilkynnt til foreldra og Barnaverndar.
Athugasemdir