Ómar Traustason, var dæmdur í átta og hálfs árs skilorðsbundið fangelsi fyrir að hafa brotið kynferðislega á að minnsta kosti sex börnum í borginni Cartagena á Spáni.
Maðurinn var ákærður fyrir að hafa brotið á átta börnum, en hann viðurkenndi brot gegn sex þeirra. Brotin fela meðal annars í sér óviðeigandi kynferðislega hegðun, tilraunir til kynferðisbrota og að hafa sýnt börnum kynferðislegt myndefni.
Frá þessu er greint í spænska vefmiðlinum Murcia Today, en DV greindi fyrst frá hér á landi. Ómar var handtekinn í fyrravor og brotin áttu sér stað í fyrra og hitteðfyrra. Ómar gekk undir nafninu El Ingles eða Sá enski í heimabæ sínum, San Cayatano í héraðinu Torre Pachero í suðausturhluta Spánar og ávann sér traust barnanna meðal annars með því að leyfa þeim að leika við hund sinn.
Bauð börnunum heim og króaði þau þar af braut á þeim
Í frétt spænska blaðsins segir að hann hafi boðið börnum heim til sín, króað þau þar af og brotið þar á þeim.
Árið 2013 dæmdi Héraðsdómur Reykjaness Ómar til þriggja ára fangelsisvistar fyrir kynferðisbrot gegn unglingspilti. Þá var hann dæmdur árið 1993 fyrir kynferðisbrot gegn fjórum 9-12 ára piltum.
Sendi þeim kynferðislegar myndir
Þá bauð hann börnum fé, allt að 100 evrur, fyrir kynlíf. Hann hafði samskipti við nokkur barnanna í gegnum samskiptaforritið WhatsApp og sendi þeim þar kynferðislegar myndir.
Dómsúrskurðurinn er skilyrtur því að Ómar brjóti ekki af sér eða hafi samskipti við börnin sem hann var dæmdur fyrir að brjóta á. Þá er honum gert að inna af hendi samfélagsþjónustu.
Utanríkisráðuneytinu er kunnugt um málið, samkvæmt talsmanni þess. Hann segir að ekki hafi verið leitað liðsinnis ráðuneytisins vegna þessa máls.
Athugasemdir