Á fjórða tímanum í nótt barst lögreglu og björgunarsveitum tilkynning um göngumann sem var kominn í sjálfheldu í hlíðum Bjarnarfjalls í Hvalvatnsfirði. Aðgerðarstjórn og björgunarsveitir voru kallaðar á vettvang.Göngumaðurinn var á svipuðum slóðum og þar sem þýski ferðamaðurinn fannst látinn.Sjá nánar
hér.
Á svæðinu eru brattar skriður sem eru mjög lausar í sér og því afar varasamar og hættulegar aðstæður. Þyrla landhelgisgæslunar var send á staðinn til aðstoðar. Um fimm klukkustundum síðar eða rétt fyrir klukkan níu í morgun var sendur sigmaður úr þyrlunni og göngumaðurinn hífður um borð. Maðurinn var sendur til aðhlynningar á Akureyri en blessunarlega kenndi hann sér ekki meins. 60 manns komu að björguninni.Lögreglan á Norðurlandi eystra gaf út tilkynningu á fésbókarsíðu sinni sem má lesa hér í heild sinni:„
Kl. 03:42
bárust lögreglu og björgunarsveitum upplýsingar um göngumann sem var kominn í sjálfheldu í hlíðum Bjarnarfjalls í Hvalvatnsfirði. Símasamband náðist við manninn, sem var ágætlega á sig kominn en búinn að vera í sjálfheldunni í nokkrar klukkustundir og búinn að reyna lengi án árangurs að koma sér úr henni. Aðgerðarstjórn var kölluð saman og björgunarsveitir kallaðar út. Nokkra stund tók að fá nákvæma staðsetningu á manninum en þegar það tókst kom í ljós að hann var á svipuðum slóðum og þýski ferðamaðurinn sem lést þarna í fjallgöngu fyrir nokkrum dögum. Þarna eru brattar og lausar skriður í sjó fram og því afar hættulegar aðstæður.Vegna erfiðra aðstæðna á vettvangi var óskað eftir þyrlu frá Landhelgisgæslunni til að aðstoða við björgunina. Einnig var björgunarsveitum stefnt á vettvang úr tveimur áttum á landi og einnig voru tveir bátar björgunarsveita sendir á vettvang. Um 60 manns unnu að aðgerðinni.
Kl. 08:40
var þyrla komin á vettvang og tókst að senda niður sigmann og hífa manninn um borð. Hann var fluttur til Akureyrar og kenndi sér ekki meins en er reynslunni ríkari.“
Athugasemdir