Anna Kristjánsdóttir veltir fyrir sér hvort það megi ekki skera á þann hnút sem myndast hefur vegna flugvallarins í Vatnsmýrinni með því að lengja flugbrautina þar. Þannig mætti brautina til norðurs yfir Tjörnina og breyta Alþingishúsinu í flugstöð. Þingmenn gætu svo farið þangað sem þeir eiga best heima, í Hegningarhúsið gamla við Skólavörðustíg.
Anna veltir þessu fyrir sér í samhengi við flugvallamál á Tenerife, þar sem hún býr. „Ég heyrði auglýsingu í útvarpinu í gærmorgun þar ýmislegt var talið upp um Gran Canaria, allt mjög jákvætt og gott samkvæmt auglýsingunni frá Vita. Þó gleymdist að nefna það sem er fegurst við Gran Canaria, en það er að sjálfsögðu fegurð útsýnisins frá Gran Canaria til vesturs, til El Teide og Paradísar,“ segir Anna.
Hún segir að allt flug hafi farið í kleinu á dögunum á Tenerife. „Annars er löngu kominn tími til að skreppa á þessa litlu eyju sem mun þó vera hin þriðja stærsta af Kanaríeyjum, en einungis Tenerife og Fuerte Ventura eru stærri, það er ef mér verður sleppt lausri í land. Það er annars gaman að bera saman Reykjanes og Tenerife, Reykjanes er um 1700 ferkílómetrar en Tenerife rétt rúmlega 2000 ferkílómetrar. Á Tenerife eru tveir alþjóðaflugvellir, en að auki eru alþjóðaflugvellir á einhverjum hinna eyjanna sem geta nýst sem varaflugvellir fyrir Tenerife ef eitthvað gerist eins og reyndar gerðist um síðustu helgi er flugvél frá RyanAir bilaði í flugtaki og flugvöllurinn lokaðist í nokkrar klukkustundir. Hinn alræmdi norðurflugvöllur (TFN) gat ekki tekið við öllu álaginu til Tenerife sur (TFS) né aðrir flugvellir á eyjunum. Flugvél Icelandair var snúið til Portúgal en vegna aukins álags þar, varð hún á endanum að lenda á Spáni,“ segir Anna.
Hvað myndi gerast á Íslandi við svipaðar aðstæður spyr Anna svo. „Ég fór að velta fyrir mér ef slíkt gerðist á álagstíma á Keflavíkurflugvelli. Reykjavík gæti aldrei tekið við öllu álaginu um leið og ég spyr hvort Reykjavík geti tekið við stærri flugvélum á borð við 767 og síðan enn stærri vélar. Sú spyr sem ekki veit. Hvað um flugvallaræksnin á Akureyri og Egilsstöðum? Alexandersflugvöllur við Sauðárkrók hefur verið nefndur, en hvað um flugvöllinn í Aðaldal? Er möguleiki á mun lengri flugbrautum þar sem og þverbraut ásamt öflugri flugstöð?,“ spyr Anna.
Hún bendir á að þessi svæði eiga það sameiginlegt að eldvirkni er spáð þar á næstunni. „Ég fór að velta þessu fyrir mér í sambandi við aukna eldvirkni á Reykjanesi, en hún er að sjálfsögðu ekkert minni hérna. Síðasta eldgos á Tenerife var að mig minnir 1909, en talið er að það líði að meðaltali um hundrað ár á milli gosa á eyjunni fögru svo það er kominn tími á nýtt eldgos. Þá hafa verið tvö gos á þessari öld á Kanaríeyjum, 2011 á El Hierro og 2021 á La Palma, en báðar eyjar teljast til vestureyjanna eins og Tenerife og La Gomera,“ segir Anna.
Svo kemur hin augljósa lausn. „Það er auðvitað til annar möguleiki á Íslandi sem er sá að lengja norður/suður flugbrautina í Reykjavík til norðurs yfir Tjörnina og breyta Alþingshúsinu í flugstöð, en þinghaldið verði flutt upp á Skólavörðustíg 9, en þar er ónotað pláss. Því yrði örugglega vel fagnað af sumum illa þenkjandi landsbyggðarmönnum, samt ekki mér.
En þetta voru svona vangaveltur dagsins. Hér er sko hugsað í lausnum.“
Athugasemdir