Á meðal stofnfélaga samtakanna Grænni byggð er sjálf drottning Íslands, Reykjavíkurborg. Veitti borgin á föstudaginn samtökunum verðlaun fyrir byggingu leikskólans Brákarborgar, við Kleppsveg.
Eða eins og fram kemur á vef Reykjavíkurborgar:
„Í máli Ragnars Ómarssonar formanns dómnefndar um Grænu skófluna kom fram að þessi bygging sé verðug fyrirmynd fyrir endurbyggingar eldri mannvirkja í framtíðinni. Hún tryggir að framkvæmdin verður sporléttari en ella og kemur í veg fyrir óþarfa framleiðslu og flutning á nýjum byggingarefnum og úrvinnslu úr auðlindum vegna byggingarinnar.
Borgarstjóri tók við Grænu skóflunni fyrir hönd Reykjavíkurborgar en gripurinn er hannaður af Heklu Dís Pálsdóttur. Einnig fengu aðrir sem komu að hönnun og byggingu mannvirkisins viðurkenningarskjöl.“
Græna skóflan kallast verðlaunin sem Dagur B. Eggertsson veitti, en þetta mun vera í fyrsta sinn sem þessi verðlaun eru veitt: Verðlaunin eru fyrir mannvirki sem byggt hefur verið með framúrskarandi og vistvænum sem og sjálfbærum áherslum:
En þar með er ekki öll sagan sögð, ekki einu sinni hálfkláruð þessi saga.
Georg Atli Hallsson, sem er deildarstjóri á leiksólanum Brákarborg, segir í samtali við vefmiðilinn mbl.is að byggingin sé einugis hálfkláruð; að starfsfólk sé undrandi á því að taka á móti leikskólabörnum við svona aðstæður.
Gefum Georgi Atla orðið:
„Þessi ræða sem borgarstjóri flytur við afhendingu á þessari viðurkenningu lætur ástandið liggja milli hluta. Það er talað aum að allt sé í blóma og að þau séu búin að skila af sér byggingu sem prýði hverfið og bæti úr þörf á leikskólaplássum í Reykjavík.
Á meðan er staðan sú að húsið er ekki fullbúið og við getum ekki tekið á móti fullri starfsemi í húsinu.“
Hann segir einnig í samtali við mbl.is að þessi vinnubrögð séu ekki til fyrirmyndar hjá Reykjavíkurborg og að foreldrar leikskólabarna á Brákarborg séu áhyggjufullir:
„Auðvitað hafa foreldrar áhyggjur af þessu. Okkur var gert að opna. Okkur starfsmönnunum finnst þetta ekki við hæfi; finnst í raun undarlegt að við séum sett í þessi spor, bæði leikskólastjóri og aðrir að taka á móti börnum í hálfkláruðu húsi þar sem við þurfum að hlaupa á milli herbergja með húsgögn til þess að uppfylla þörfina sem nú er.“
Þá má nefna að skrifstofa leikskólastjórans er einungis geymsla; auk þess sem iðnaðarmenn í fullum herklæðum og umferð stórvirkra vinnuvéla eru daglegt brauð á leikskólanum nýverðlaunaða en hálfkláraða.
Athugasemdir