Mikil mótmæli standa nú yfir við Rússneska sendiráðið í Reykjavík og er blaðamaður Mannlífs, Björgvin Gunnarsson, á vettvangi. Forseti Rússlands, Vladimir Putin, heldur upp á sjötugsafmæli sitt í dag og hefur fólksfjöldinn við sendiráðið vakið mikla athygli.
„Ég er að mótmæla vegna þess að ég er á móti ofbeldi sem Vladimir Putin beitir Úkraínumenn. Ég er einnig á móti ofbeldi sem hann beitir sína eigin borgara. Þeir segja að við höfum misst 6 þúsund manns í Úkraínu, sem er lygi, því við höfum misst mun fleiri hermenn og almenna borgara. Núna er ég í frjálsu landi og þessvegna mótmæli ég. Í Rússlandi má ég ekki mótmæli,“ sagði Maria, sem var viðstödd mótmælin í dag. Maria sem er rússnesk, segist hafa flúið land sitt en hún ætli sér ekki að sitja hjá meðan bæði Rússland og Úkraína þjást.
„Ég mun aldrei þegja. Að sitja hjá og segja ekkert er rangt. Rússar þora ekki að mótmæla vegna þess að þeir eru í hættu ef þeir gera það. Fyrir mótmæli eru þeir sendir í herinn, látnir borga háar upphæðir, eða sendir í fangelsi í áraraðir.,“ segir Maria að lokum. Að sögn blaðamanns Mannlífs á vettvangi er fólk reitt og vonsvikið en þrátt fyrir það sé samstaðan mikil.
Að sögn blaðamanns heldur fólk hér á Rússneska fánanum þar sem rauða litinn vantar. Þau segja rauðann nú tákna blóð og hafa því fjarlægt hann. Eftir stendur hvítur og blár.
Athugasemdir