Guðjón Valdimarsson, vopnasali og faðir Sigríðar Bjarkar ríkislögreglustjóra, sagði við rannsóknarlögreglumann sem tók skýrslu af honum á heimili hans, í tengslum við rannsókn lögreglu á meintu hryðjuverkamáli, að ef þeir hefðu kynnt sér ættartengsl hans hefðu þeir ekki komið á heimili hans, nema um væri að ræða hefndarráðstöfun gagnvart dóttur hans.
„Ef þið bara hefðuð skoðað hver skyldmenni mín eru, þá hefðuð þið ekki komið hingað,“ sagði Guðjón meðal annars í skýrslutökunni hjá lögreglunni. Stundin greinir frá.
Sjá einnig: Faðir Sigríðar selur byssur á netinu – Allsendis óvíst hvort hann tengist hryðjuverkamálinu
Mennirnir sem grunaðir eru um að hafa verið að skipuleggja hryðjuverkaárás hér á landi báru við yfirheyrslur að hálfsjálfvirkt skotvopn í þeirra fórum væri fengið frá Guðjóni, vopnasala og föður ríkislögreglustjóra. Þá hefði Guðjón keypt þrívíddarprentað skotvopn af öðrum mannana.
Öllu þessu hafnaði Guðjón í yfirheyrslu lögreglunnar og bauðst til að fara í lygapróf því til staðfestingar. „Já. Ef þú vilt þá skal ég fara í þarna ef þið hafið einhvers konar þarna lyga, lygapróf þá er það bara sjálfsagt. Ég hef aldrei átt þrívíddarprentað skotvopn. Ég hef aldrei séð það nema bara á myndum, í sjónvarpinu og aldrei handleikið það. Er þetta nógu skýrt?,“ spurði Guðjón lögregluna og bætti við:
Sjá einnig: Guðjón sagði útlendingum að hunskast heim til sín: „Það bara fauk í mig“
„Hversu gáfulegt heldur þú að það sé fyrir mig sem að, vopnasala og faðir ríkislögreglustjóra, að kaupa þrívíddaprent, þrívíddprentaða byssu og hafa hana hér eða hvar sem væri sem hún gæti fundist á mínum vegum. Hversu gáfulegt fyndist þér það vera? Þið eruð raunverulega að segja að ég sé fáviti. Það bara hlýtur að vera. Vegna þess að það dytti engum heilvita manni í hug að gera þetta.“
Athugasemdir