Sigurður Arnar Sigurðsson, skólastjóri Grundaskóla og formaður skólastjórnendafélags Vesturlands, segir að íslenskum skólum sé kennt um allt það sem aflaga fer og misferst í samfélaginu. „Umræðan er oft á tíðum með slíkum eindæmum að skólafólk á ekki eitt aukatekið orð,“ segir Sigurður og heldur áfram:
„Harkan og óbilgirnin sem þarna á sér stað er eitthvað sem við sem samfélag þurfum að hugsa alvarlega um. Þessi umræða einkennist umfram annað af fullyrðingum sem standast illa skoðun og byggja oftar en ekki á mati einstaklinga sem telja sig hafa fundið upp einu réttu lausnina og hafi svar við öllum hlutum.“
Sigurður segir skólastofnanir mikilvægar en að gera þær ábyrgar fyrir öllu sem misfarist sé einkennilegt svo ekki sé sterkara til orða tekið. Þegar fjallað sé um erfiðar forræðisdeilur sem fjallað er um í fjölmiðlum, vaxandi rasíska orðræðu, eineltismál, stuldur ungmenna í stórmarkaði, hópslagsmál ungmenna á leiksvæði um helgi, og vaxandi áhyggjur af tölvu og símafíkn barna og ungmenna þá sér hann alltaf spurt:
„Hvað ætlar skólinn að gera?“
Sigurði finnst umræðan um skólana alltof oft tengjast neikvæðum hlutum en allir ættu að vita að nám og uppeldi sé flóknara en svo að sé eitt rétt svar eða ein rétt leið sem hentar öllum.
„Skólar og starfsmenn þeirra ætla ekki að elta niðurrifstal, sleggjudóma og á köflum hreinan dónaskap á samfélagsmiðlum. Á slíku er ekkert gott að byggja. Ég fullyrði að skólafólk vill vinna með nemendum sínum, foreldrum og skólasamfélaginu í að skapa betra samfélag. Áskoranir nútímans eru ekki einkamál skóla heldur okkar allra. Til að skólar verði enn betri menntastofnanir og veiti betri þjónustu þarf aðhald en fyrst og fremst samvinnu, velvild og stuðning,“ segir skólastjórinn.
Athugasemdir