Katrín kveður Jónatan: „Tani kenndi manni að gefast ekki upp“

Katrín Jak­obs­dóttir for­sæt­is­ráð­herra kveður góðan félaga, Jónatan Jóhann Stef­áns­son, á Facebook. Jónatan lést nýlega og var bor­inn til grafar í dag. Katrín minn­ist þess að Jónatan hafi kennt henni að gef­ast aldrei upp, sama þótt á móti blési. Katrín skrifar:

„Í dag berum við hann Jónatan Jóhann Stef­áns­son til grafar. Jónatan, eða Tani eins og hann var kall­aður, var stofn­fé­lagi í Vinstri­hreyf­ing­unni-grænu fram­boði, dug­leg­astur allra að mæta á fundi og man ég vel eftir honum á fyrsta fundi mínum í Reykja­nesbæ þegar ég mætti þar sem nýr vara­for­maður hreyf­ing­ar­innar, blaut á bak við eyrun. Ég heim­sótti Jónatan reglu­lega og þá fór hann yfir stöðu þjóð­mál­anna en líka ræddi hann báta og skip, vélar og véla­hljóð, minni hans á þesum sviði var alveg hreint ótrú­legt.“

Með minn­ing­ar­orð­unum deilir hún mynd­inni sem má sjá hér fyrir neðan. „Og þá hef ég ekki nefnt sýslu­menn­ina sem hann hlýddi mér yfir enda kunni þá alla, aft­urá­bak og áfram. Síðasta heim­sókn mín til hans var á hjúkr­un­ar­heim­ilið í Grinda­vík þar sem fór vel um hann þótt nokkuð væri af honum dregið. Ég var þá í lopa­peysu sem Jónatan hafði fengið vin­konu sína til að prjóna svo við gætum verið í stíl í rauð­grænum vg-lopa­peysum. Það var sama þótt á móti blési, Tani var alltaf traustur félagi og kenndi manni að gef­ast ekki upp. Sá lær­dómur hefur reynst dýr­mætur,“ segir Katrín.