Brynjar Níelsson steig fram á Facebook í dag með völvuspá sem hann sagðist hafa fengið í hendurnar frá eldri konu. Í „spánni“ dregur hann vinstrimenn sundur og saman í háði.
Brynjar Níelsson, fyrrverandi þingmaður Sjálfstæðisflokksins og núverandi aðstoðamaður Jóns Gunnarssonar dómsmálaráðherra, skrifaði færslu á Facebook fyrir stundu þar sem hann segist sækja námskeið hjá Karli Th. Birgissyni um „listina að halda kjafti“ eins og hann orðar það. Þá kemur hann fram með völvuspá þar sem hann lætur vinstrimenn fá það óþvegið og má segja að allt það sem Brynjar hefur verið gagnrýndur fyrir í gegnum tíðina, skíni vel í gegnum alla spánna en sitt sýnist sjálfsagt hverjum. Hér er færslan í heild sinni:
„Gleðileg jól, kæru fésbókarvinir. Ég hef haft tiltölulega hljótt um mig á fésbókinni undanfarið. Ástæðan er sú að ég sæki námskeið hjá Karli Th. Birgissyni um listina að kunna að þegja eða halda kjafti eins og hann orðar það. Þetta er námskeið sem er ætlað öðrum en vinstri mönnum og er fjármagnað af Samfylkingunni og Pírötum með peningum úr ríkissjóði. Þá hafa vinstri flokkarnir boðið upp á námskeið hvernig misfara á með skattfé en láta það líta út sem manngæsku. En þar sem ég er að læra listina að þegja ætla ég á næstunni að birta texta eftir aðra og byrja á völvuspá fyrir næsta ár sem gömul kona úr vesturbæ sendi mér og bað mig um að koma á framfæri. Hún er svona orðrétt:
“Mikið mun gerast í heimi fjölmiðla á nýju ári. Stundin og Kjarninn munu sameinast til að efla rannsóknarblaðamennsku, ekki síst til að upplýsa um kennitöluflakk í íslensku samfélagi. Blaðamenn munu verðlauna hvern annan á árinu sem aldrei fyrr fyrir að upplýsa um spillingu og brot án þess að nokkuð upplýsist frekar en áður. Nokkur ólga mun verða innan fjölmiðlaheimsins sem mun brjótast út í miklum mótmælum yfir aðför stjórnvalda gegn þeim, einkum vegna þess að ætlast er til að það gildi sömu lög og reglur um þá og aðra og svo yfir því að dregið verður úr fjárstreymni til þeirra úr vasa skattgreiðenda. Það endar með stórum útifundi á Austurvelli þar sem listamenn á launaskrá ríkisins koma fram og Kristinn Hrafnsson verður með uppistand ásamt Stefáni Ingvari Vigfússyni. Þá mun framkvæmdastjóri Transparency International flytja erindi á fundinum um muninn á góðri spillingu og vondri spillingu.
Í heimi stjórnmála munu ráðherrar keppast við að greiða bætur úr ríkissjóði. Mér sýnist dómsmálaráðherra ætla að greiða afkomendum Agnesar og Friðriks í beinan legg tölverða fjárhæð enda það mál hvílt mjög á landsmönnum, ekki síst Húnvetningum, en dómsmálaráðherra var einu sinni sauðfjárbóndi á Barkarstöðum í Húnvatnssýslu og á þar sterkar rætur. Þá mun barnamálaráðherra leggja til að ungbörnum sem látin voru sofa úti í barnavagni hjá dagmömmum, oft grátandi, verði greiddar bætur. Einnig börnum sem voru á árum áður í beisli bundin við girðinguna í garðinum, og munu það vera nánast allir landsmenn sem komnir eru yfir sextugt.
Það verða talsverðar breytingar á þinginu. Einhver Pírati mun flytja til Írans, jafnvel fleiri en einn, ásamt mörgum feministum, sem telja staða kvenna sé betri þar en hér á landi, bæði hvað varðar borgarleg réttindi og klæðaburð. Þá mun Pírati, sem hefur verið áberandi á alþjóðlegum vettvangi, en enginn hlustar á, halda námskeið um pólitíska ábyrgð og hvernig sú ábyrgð tengist siðareglum eða ekki. Einhver hringlandi verður á ráðherraliðinu og mér sýnist að þeir verði látnir taka pokann sinn sem eitthvert gagn hafa gert. Einhver aðstoðarmaður ráðherra mun skandalísera á árinu og verður látinn fara. Sé ekki alveg hver það er en hann er karlkyns og hefur ekki útlitið með sér.
Ástandið í Reykjavíkurborg mun batna mikið þegar líður á árið. Það mun hætta að snjóa í sumar þegar þjónustuhandbækurnar verða loksins uppfærðar eftir þrotlausa vinnu margra starfshópa. Jafnframt mun draga úr loftslagskvíða meirihlutans í borginni og orðið hamfarahlýnun mun heyrast sjaldnar. Ég sé að borgin ætlar að taka á fjárhagsvandanum með því að syngja á fundum borgarstjórnar og halda geðsjúkum heima hjá sér. Þess á milli ætlar meirihlutinn í borginni að skála í kampavíni saman á Kjarvalsstofu til að fagna því hversu æðisleg þau eru.
Mikilvægustu ríkisfyrirtækin, ÁTVR og RÚV, munu eiga erfitt uppdráttar á nýju ári. Á endanum nennir enginn að hlusta á sama fólkið í Vikunni hjá Gísla Marteini upphefja sjálfan sig og tala illa um aðra og endalausar fréttir frá fréttastofunni um hamfarahlýnun, kynsegin fólk og mannvonsku sem fylgir hvalveiðum. Þá mun RÚV afleggja allar siðareglur um starfsmenn sína sem og aðrar reglur enda almannaútvarp í almannaeigu. Enn erfiðara verður árið fyrir ÁTVR. Landsmenn eru komnir á þann stað að vilja kaupa áfengi annars staðar en í verslunum ÁTVR eins og þeir vildu á sínum tíma kaupa mjólkurvörur í öðrum búðum en mjólkurbúðum. Mér sýnist samt ÁTVR lifa árið af og jafnvel lengur ef framsóknarmenn í öllum flokkum verða svona margir áfram.”
Svona mörg voru orð völvunnar. Hún hefur reynst sannspá í gegnum tíðina. Hefur til að mynda spáð jarðhræringum og eldgosum á Íslandi, sem hefur heldur betur reynst rétt. Ekki á hvers manns færi að sjá það fyrir. Ég sleppti að vísu úr spánni því sem gæti verið móðgandi fyrir einhverja. Það er nefnilega kennt á námskeiðinu um listina að þegja að ritstýra og þagga niður allt óþægilegt. Það er kennt í kaflanum um hatursorðræðu en það hugtak var fundið upp á gamla Þjóðviljanum.“
Athugasemdir