Stefán Pálsson segist ekki muna eftir skólafríum í æsku en segist þó muna eftir að hafa eytt fjöldi daga í vinnunni hjá föður sínum og fleiri ættingjum.
Nú þegar vetrarfrí er hafið í mörgum grunnskólum, að minnsta kosti á höfuðborgarsvæðinu, hafa foreldrar þurft, líkt og áður, að redda málunum á ýmsan hátt, til að láta heimilislífið ganga. Sagnfræðingurinn og spurningakeppnisgúrúinn bráðskemmtilegi, Stefán Pálsson skrifaði spaugilega færslu í gær, á fyrsta degi vetrarfrís ýmissa grunnskóla höfuðborgarsvæðisins. Segist hann ekki muna eftir vetrarfríium í æsku en þó muni hann eftir að hafa eytt ómældum tíma í vinnu föður síns og fleiri ættingjum. Færsluna má lesa hér:
„Í minningunni voru aldrei frí í skólanum þegar ég var pjakkur. Þess vegna hnussa ég yfir öllum starfsdögunum, vetrarfríunum og Óðinn má vita hvað þetta heitir allt saman…
En um leið man ég eftir öllum dögunum sem ég varði í vinnunni hjá pabba, afa eða öðrum tilfallandi ættingjum til að brúa eitthvað bil. Mamma var kennari og því augljóslega ekki hægt að láta mig hanga uppí skólanum hennar nema í allra ítrustu neyð. Ömmur mínar unnu á kontórnum hjá SÍF og í vinnslunni hjá Sláturfélaginu og það var enginn staður fyrir börn heldur.En pabbi vann á Hafró og afi var hjá BSRB og þar var hægt að láta gutta í skólafríi skottast um. Helsta afþreyingin fólst í því að fá að teikna á fágætan ljósritunarpappír, fikta í stimplum og göturum, leika sér í lyftunni og í húsi Hafrannsóknarstofnunar voru uppstoppaðir furðufiskar á hverri hæð að skoða og svo var sjoppa í mótttökunni þar sem ég fékk að raða sígarettupökkum og Valencia-súkkulaðiplötum. Þessir dagar voru eftir á að hyggja margfalt minnisstæðari en hvunndagsrútínan í skólanum sem öll rann út í eitt.
Skítareddingar eru bestar!“
Í kjölfar færslunnar skrifuðu margir athugasemdir og rifjuðu upp sínar minningar í skólafríum fortíðar. Ein þeirra var Eva Hauksdóttir lögmaður: „Ég man ekki eftir neinum vetrarfríum en aftur á móti 15 vikna sumarfríi. Og starfsdögum kennara sem þá hétu mánaðarfrí.“
Athugasemdir