Þórður Snær Júlíusson, annar ritstjóra Heimildarinnar tjáði áhyggjur sínar á stöðu einkarekinna íslenskra fjölmiðla eftir niðurlagningu Fréttablaðsins og Hringbrautar.
„Þetta er afleiðing af pólitískri stefnumörkun sem felur í sér að gera nánast ekkert til að bregðast við stöðu sem hefur blasað við árum saman. Það blasir við að ráðamenn lita ekki á frjálsa og fjölbreytt fjölmiðla sem mikilvæga lýðræðisstoð heldur sem óvini, óþægindi,“ skrifaði Þórður á Twitter síðu sinni. „Samhliða hinni kerfisbundnu veikingu fjölmiðla hverfisins hefur valdafólk eflt verulega alla aðra upplýsingamiðlun. Skattfé hefur verið dælt í upplýsingafulltrúa, aðstoðarmenn og starfsmenn flokka sem hafa það hlutverk að láta yfirmenn sína líta vel út. Hagsmunagæslusamtök hafa gengið á lagið og nýtt sér þessa vegferð stjórnmálamanna og hert tök sín á narratívi þjóðmálaumræðu. Afleiðingin er að stjórnmálaflokkar, ráðamenn, lobbýistar miðla miklu magni upplýsinga í búningi „frétta”.
Ef sterkir frjálsir, fjölbreyttir og sjálfstæðir fjölmiðlar, í ólíku eignarhaldi með sterkar og fyrirsjáanlegar rekstrarforsendur, eru ekki til staðar þá fá slíkir aðilar það hlutverk endanlega. Við erum að nálgast þann stað hratt.
Ég hef árum saman bent á að stjórnmálamenn þurfi að spyrja sig: Skipta fjölmiðlar máli? Ef svarið er já þá þurfa þeirra að gera eitthvað stórtækt, hratt. Hingað til hefur svarið, miðað við verk þeirra þvert á flokka, hins vegar því miður verið nei.“
Hátt í hundrað starfsmönnum Torgs var sagt upp í gærmorgun eftir ákvörðun fyrirtækisins að hætta rekstri miðlanna tveggja. Sigmundur Ernir Rúnarsson, fráfarandi ritstjóri Fréttablaðsins segir einokun Ríkisútvarpsins hafa verulega slæm áhrif á einkarekna fjölmiðla. „Það hefur aldrei verið gert ráð fyrir því að einkareknir fjölmiðlar væru reknir við hliðina á Ríkisútvarpinu. Það hefur allt forskotið og það er þverpólitísk sátt um að hafa þetta svona og meðan svo verður munu einkareknir fjölmiðlar leggja upp laupana í ríkari mæli,“ sagði Sigmundur Ernir í samtali við Vísi.
Athugasemdir