Hin sögufræga María Júlía var fylgt til hafnar á Akureyri af varðskipinu Þór, í lok marsmánaðar. Báturinn þjónaði Landhelgisgæslunni í fjöldi ára og tók meðal annars þátt í fyrsta þorskastríðinu. Var hann fluttur frá Ísafirði til Akureyrar þar sem hann fer í slipp. Ferðin gekk með ágætum en nær alla leið voru veðuraðstæður krefjandi. Gæslan segir frá þessu á vef sínum.
Fram kemur á vef Gæslunnar að í samantekt Sigurlaugs Ingólfssonar um skipakost Landhelgisgæslunnar í þorskastríðunum, segir að ástæða þess að Gæslan eignaðist Maríu Júlíu var sú að Vestfirðingar höfðu safnað um langt árabil fyrir björgunarskipi sem þjónað gæti Vestfjörðum. Það var svo árið 1950 sem sá draumur rættist.
Hjónin María Júlía Gísladótir og Guðmundur Guðmundsson frá Ísafirði gáfu Björgunarsjóði Vestfirðinga stærstu gjöfina en þau gáfu aleigu sína til sjóðsins. Þótti því tilvalið að nefna bátinn María Júlía.
Báturinn var smíðaður í Danmörku, var úr eik, 137,4 rúmlestir, 27,5 m á lengd og 6,37 m á breidd. Auk hefðbundinna gæslustarfa var María Júlía sérhæfð til fiskveiðirannsókna, með trollvindu og öðrum viðeigandi búnaði, og til björgunar.
Hraðinn var ekki mikill á skipinu enda aðeins búið 425 hestafla díselvél. Fallbyssa, 47mm var í stefni skipsins. Árið 1969 var María Júlía seld og nýtt við fiskveiðar um langt skeið og hefur verið við bryggju á Ísafirði síðustu ár.
Athugasemdir