Erna Kristín varar við starfsháttum íslensks miðils víðsvegar á samfélagsmiðlinum Facebook. Erna segir farir sínar við miðilinn ekki sléttar og lýsir því hvernig endurteknar tímatilfærslur að hendi miðilsins hafi gert það af verkum að hún hafi óskað eftir endurgreiðslu. Þá hafi miðillinn hætt að svara henni og Erna Kristín enn ekki fengið endurgreiðslu á 22 þúsund krónum sem reiddar voru fyrirfram. Hálft ár er síðan Erna pantaði umræddan tíma hjá miðlinum.
„Ég myndi passa mig að bóka ekki tíma hjá þessari konu, hún er miðill og tímarnir eru í gegnum instagram video. Ég hafði heyrt frá meðmæli með henni frá ýmsum áhrifavöldum og bókaði því tíma hjá henni í nóvember 2022. Ég fékk tíma 23. mars 2023 og var svo spennt að ég taldi niður dagana. Hún frestaði tímanum mínum aftur og aftur þar til ég bað hana um endurgreiðslu.. Í dag er 5. apríl og hún hefur ekki enn skilað peningum mínum (22 þúsund)“
Erna Kristín birtir skjáskot af samskiptum sínum við miðilinn máli sínu til stuðnings. Fjölmargir hafa sett athugasemdir við færslurnar og þó nokkrir lent í svipuðu klandri:
„Ég lenti í þessu sama með endalausar frestanir, vikum saman sem endaði á að ná tímanum og hann olli töluverðum vonbrigðum.“
„Hef sömu sögu að segja, því miður. Endalausar frestanir og endaði þannig að hún kláraði ekki tímann.“
„Ég tilkynnti hana til lögreglunnar. Sagði henni frá því og fékk þá endurgreitt.“
Miðillinn heldur úti Instagram-reikningi og er fylgjendahópurinn töluvert stór eða tæplega 3700 manns.
Mannlíf reyndi að hafa samband við umræddan miðil vegna málsins en án árangurs.
Rétt í þessu: Erna Kristín hefur uppfært færslurnar og segist nú hafa fengið endurgreitt.
Athugasemdir