Umboðsmaður Alþingis hefur óskað eftir frekari skýringum á afstöðu Bjarna Benediktssonar, formanns Sjálfstæðisflokksins og fjármála- og efnahagsráðherra, til hæfis hans vegna sölu á 22,5 prósenta hlut ríkisins í Íslandsbanka hf. í mars í fyrra, en það er hringbraut.is sem greindi frá.
Þá fer umboðsmaður fram á öll gögn verði afhent sem fyrir liggja um samskipti hans og ráðuneytisins við Bankasýslu ríkisins; alveg frá því að söluferlið hófst þar til úthlutun hlutabréfa lauk.
Beinist athugun umboðsmanns að álitamálum um hæfi Bjarna vegna kaupa einkahlutafélags föður hans á hlut í bankanum.
Kemur fram að í framhaldi af svari ráðherra frá 24. mars sl. sé nú óskað eftir nánari og ítarlegri skýringum á afstöðu ráðherra; hvort hann telji það hafa verið forsendu hugsanlegs vanhæfis síns í málinu að hann hefði vitneskju um að einkahlutafélagið væri meðal bjóðenda.
Þá telur Umboðsmaður enn fremur ekki fyllilega ljóst hvort ráðherra telji það fyrirkomulag sem viðhaft var við söluna hafi í reynd tryggt að gætt yrði hæfisreglna.
Í ljósi þess að í svari Bjarna kom fram að engin athugun á slíkum tengslum fór fram innan ráðuneytisins, óskar umboðsmaður einnig eftir upplýsingum um hvort það hafi litið svo á að Bankasýslunni bæri að kanna þessi atriði.
Spyr hann í því sambandi hvort stofnuninni hafi verið ljóst að einkahlutafélag í eigu föður ráðherra væri á meðal bjóðenda; og þá hvers vegna athygli ráðuneytisins hafi eigi verið vakin á því.
Umboðsmaður Alþingis, Skúli Magnússon, spyr Bjarna fjármálaráðherra nokkurra beinna spurninga og krefst svar.
Í lok bréfs hans segir:
„Hafi ráðuneytið, eða þér, átt í samskiptum við þá einkaaðila, sem komu að sölunni fyrir hönd stjórnvalda á þessum tíma, er þess jafnframt óskað að afrit af öllum gögnum sem liggja fyrir um það verði afhent.“
Athugasemdir