Kjartan Magnússon borgarfulltrúi Sjálfstæðisflokksins segir að það sé „pólitísk ákvörðun meirihluta Framsóknarflokks, Samfylkingar, Pírata og Viðreisnar að skerða notagildi Reykjavíkurflugvallar. Fyrirliggjandi eru álit fjölmargra sérfræðinga, sem sýna að umrædd byggð mun skerða notagildi vallarins.“
Hann bætir því við að „það hefur lengi verið stærsta skipulagsmál Samfylkingarinnar að þrengja að Reykjavíkurflugvelli og flæma þannig flugvallarstarfsemi úr borginni. Framsóknarflokkurinn hefur lengi staðið þétt að baki flugvallarstarfsemi í Reykjavík. Árið 2014 bauð flokkurinn fram undir nafninu ,,Framsókn og flugvallarvinir“ til að ítreka stuðning sinn við Reykjavíkurflugvöll. Framsóknarflokkurinn hefur nú tekið upp stefnu Samfylkingarinnar í málefnum Reykjavíkurflugvallar í skiptum fyrir borgarstjórastólinn. Vegna viðsnúnings Framsóknarflokksins í málefnum Reykjavíkurflugvallar er eðlilegt að spurt sé:
Mun Framsókn næst bjóða fram undir heitinu ,,Framsókn og flugvallarandstæðingar“?“
Ennfremur að „fyrirhuguð byggð í ,,Nýja Skerjafirði“ mun að óbreyttu þrengja að Reykjavíkurflugvelli og skerða notagildi hans verulega vegna þeirra áhrifa, sem byggðin mun hafa á vindafar á flugvellinum og í næsta nágrenni hans.
Öryggisnefnd Félags íslenskra atvinnuflugmanna sendi frá sér ályktun þar sem harmað er að innviðaráðherra hafi farið gegn frægu samkomulagi frá 2019. Nefndin telur að gera þurfi mun ýtarlegri rannsóknir en nú liggja fyrir varðandi vindafar til að skera úr um hvaða áhrif aukin byggð í Skerjafirði hafi á notagildi og öryggi vallarins. Frekari rannsóknir eru því nauðsynlegar áður en endanleg leyfi verða gefin fyrir viðbótarbyggð við Reykjavíkurflugvöll.
Þessar rannsóknir eru það sem tillaga borgarfulltrúa Sjálfstæðisflokksins snýst um.“
Kjartan er klár á því að „Reykjavíkurflugvöllur gegnir nú mjög mikilvægu hlutverki á landsvísu varðandi farþegaflug, sjúkraflug og björgunarflug. Mikilvægi Reykjavíkurflugvallar sem varaflugvallar Keflavíkurflugvallar hefur aukist mjög á undanförnum árum vegna stóraukinnar flugumferðar. Reykjavíkurflugvöllur tekur nú við flestum flugvélum utan Keflavíkurflugvallar sem varaflugvöllur sem á þarf að halda en flugvellirnir á Akureyri og Egilsstöðum eru af ýmsum ástæðum mjög takmarkaðir að þessu leyti.“
Nefnir einnig að „umrædd byggð mun líklega einnig skerða notagildi Reykjavíkurflugvallar sem varaflugvallar í millilandaflugi. Skert notagildi Reykjavíkurflugvallar sem varaflugvallar mun kosta flugfélög, sem fljúga til og frá Íslandi, milljarða króna árlega. Ástæðan er aukinn kostnaður við meiri eldsneytishleðslu svo flugvélar nái til Glasgow ef ekki reynist unnt að lenda þeim á Keflavíkurflugvelli. Slíkt myndi að sjálfsögðu hækka verð á flugmiðum til og frá Íslandi.“
Kjartani þykir „undarlegt að fulltrúar meirihlutaflokkanna skuli enn og aftur vísa til Hvassahrauns sem óskakosts varðandi lagningu nýs millilandaflugvallar, þrátt fyrir að löngu sé orðið ljóst að sú hugmynd sé óraunhæf.
Jarðvísindamenn hafa lengi varað ráðamenn við slíku staðarvali vegna jarðhræringa og eldgosahættu. Atvinnuflugmenn hafa einnig um langt skeið varað við flugvelli í Hvassahrauni vegna lélegra aðflugsskilyrða og sviptivinda.
Ekki hefur verið gerð fullnægjandi flugfræðileg rannsókn á vindafari við völlinn eins og sérfræðingar hafa bent á.“
Athugasemdir