„Það er bara uppselt! Við erum komin langt yfir þolmörk,“ segir Margrét Þórarinsdóttir, bæjarfulltrúi Umbótar í Reykjanesbæ og yfirflugfreyja í útvarpsþættinum Bítinu á Bylgjunni. Þar ræddi hún við þáttastjórnendur um gríðarlegan fjölda flóttamanna í Reykjanesbæ. „Við erum komin með nóg,“ segir Margrét og bætir við að staðan hafi verið rædd á bæjarstjórnarfundum en að skoðanir Umbótar rími ekki alltaf við skoðanir meirihlutans.
Margrét segir að háværu kalli íbúa sveitafélagsins eftir íbúafundi hafi ekki verið svarað af sitjandi meirihluta. Síðasti íbúafundurinn var haldinn í mars en hann fór framhjá mörgun og Margrét segir stöðuna hafa versnað mikið síðan þá.
„Við verðum að hlusta á íbúa Reykjanesbæjar og ef þeir hafa áhyggjur – þá verðum við að verða við því kalli,“ segir hún og bendir á að nauðsynlegt sé að halda íbúafund. „Við verðum að hlusta“
Aðspurð hvaða lausn Margrét sjái á stöðunni svarar hún:
„Það sem við getum gert er að segja stopp! Hingað og ekki lengra. Við getum ekki tekið við fleiri flóttamönnum“.
Reykjanesbær getur ekki séð um flóttamannamálin á Íslandi, útskýrir Margrét og bætir við að vaxandi straumur flóttamanna telji á tugum eða hundruðum í hverjum mánuði. Þá bendir hún á að stjórnvöld verði að leysa þann vanda sjálf.
Fram kom í viðtalinu að ríkið hafi leigt mikinn fjölda bygginga og íbúða á Ásbrú fyrir flóttamenn og að talsvert hafi verið um að einstaklingar og fjölskyldur sem búsettar voru fyrir á svæðinu hafi ekki fengið endurnýjun leigusamninga sökum þessa. Aðspurð hvort að sveitarfélagið muni aðstoða þann hóp í leitinni að nýju húsnæði svarar hún:
„Ég ætla að vona það og að þau fái húsnæði og lendi ekki á götunni.“
Um það bil 1.500 flóttamenn er nú búsettir í Ásbrú og segir hún að með þessu áframhaldi muni þetta enda með ósköpum. Nauðsynlegt séð að horfa til nágrannaríkjanna og læra af þeirra reynslu.
Í lokin vill Margrét bæta við:
„Stjórnvöld verða að byggja flóttamannabúðir – en það er ekki pláss fyrir þær í Reykjanesbæ, þau verða að taka á vandamálinu.“
Athugasemdir