Pétur Ásgeirsson sagði frá hörmulegri reynslu dóttur sinnar sem fór ásamt frænku sinni í sund í Grafarvogi. Þar urðu stúlkurnar fyrir áreiti af hálfu eldri konu.
„Mamma hennar er frá Gvatemala, þar sem ég bjó í tíu ár og börnin mín fæddust. Við erum búin að búa hér síðan árið 2017 og dóttir mín farið í gegnum grunnskóla hér og svo framvegis. Hún fór í sund í gær ásamt frænku sinni sem er hér í heimsókn frá Gvatemala,“ sagði Pétur í samtali við Vísi en hann birti færslu á íbúasíðu Grafarvogs á Facebook þar sem hann lýsti atburðum.
Hann segir aðra stelpuna hafa verið stressaða fyrir sundferðinni enda sé þetta hennar fyrsta reynsla á slíku. Stúlkurnar héldu í klefann þar sem þær klæddu sig í sundföt áður en þær fóru í sturtu, þar sem þær hugðust klæða sig úr til þess að baða sig.
Pétur segist hafa undirbúið þær vel undir sundlaugarferðina, enda öðruvísi að fara í sund á Íslandi en annars staðar. „Önnur þeirra var sérstaklega stressuð, enda að gera þetta í fyrsta skiptið,“ segir Pétur.
Hann segir þær hafa byrjað á að klæða sig í sundbol og farið þannig í sturtuna. Þar hafi þær ætlað að klæða sig úr til þess að baða sig fyrir laugina.
„Þá kemur sem sagt einhver kona og bendir þeim á á leiðinlegan hátt að þær þurfi að fara í sturtu áður en þær fara út í. Sem er svo sem allt í lagi í sjálfu sér, eins og ég útskýrði fyrir þeim, að það er eðlilegasti hlutur í heimi að benda fólki á sundreglur hér á Íslandi, sérstaklega fyrir fólk erlendis frá sem kannski áttar sig ekki á þessu. Svo kemur hún með svona athugasemd um að það sé þeim að kenna hvað Ísland sé orðið skítugt og allt sé orðið ógeðslegt og segir þeim að þær ættu bara að drullast til baka heim til sín. Dóttir mín fór að hágráta og bað hana afsökunar og sagði að þær myndu baða sig.“
Frænkurnar voru miður sín eftir reynsluna og sögðu Pétri frá. Hann reyndi að komast að því hver konan væri en honum var sagt að enginn sundlaugarvörður hafi verið í klefanum.
Athugasemdir