Illugi Jökulsson er með kenningu um komandi kosningabaráttu Sjálfstæðisflokksins.
Í nýrri færslu á Facebook segir Illugi Jökulsson fjölmiðlamaður að Sjálfstæðisflokkurinn ætli að „magna upp og keyra á útlendingaandúð“ í kosningunum sem haldnar verða í haust. Færslan hefur vakið gríðarlega athygli en hátt í fjögur hundruð manns hefur líkað við hana og um hundrað skrifað athugasemd við hana.
„Það verða kosningar í haust. Sjálfstæðisflokkurinn ætlar að magna upp og keyra á útleningaandúð. Hann hefur ekkert annað og það hefur oft gefist hægriflokkum vel að búa til „útlenskan óvin“ sem hægt er að kenna um allt illt. Sjálfstæðisflokkurinn er nógu ómerkilegur til að fara þá leið. Þið lásuð það fyrst hér,“ skrifaði Illugi á Facebook.
Fjöldi manns skrifaði athugasemd við færslu Illuga en óhætt er að segja að fólk skiptist í tvær fylkingar. Orri Björnsson, forstjóri líftæknifyrirtækisins Algalífs og Sjálfstæðismaður var einn þeirra ósáttu: „Þetta er verulega ómerkilegt hjá þér. Svei!!!“
Þessu svaraði Einar Steingrímsson stærðfræðingur en hann sparaði ekki stóru orðin: „Það er verulega ómerkilegt, svo ekki sé dýpra tekið í árinni, hjá ráðherrum Sjálfstæðisflokksins að tala um hælisleitendur sem vandamál. Ekki bara af því þeir eru ekki vandamálið, frekar móttökurnar sem þeir fá, heldur líka af því að Sjálfstæðisflokkurinn hefur ráðið dómsmálaráðuneytinu í tíu ár.
En þetta er dæmigert fyrir eigendur flokksins þíns. Að tala með þjósti um meint vandamál sem þeir hafa sjálfir skapað (sama gildir um fjölgun ríkisstarfsmanna), og láta eins og allt sé öðrum að kenna. Aumingjar (og reyndar margt verra en það, en ég ætla að halda mig á kurteisu nótunum í kvöld).“
Athugasemdir